दक्षिण आफ्रिका आणि भारत यांच्यातील वनडे सामन्यात अर्धशतक झळकावल्यानंतर विराट कोहलीने (Virat Kohli) VVIP गॅलरीत उभ्या असलेल्या अनुष्का शर्मा (Anushka Sharma) आणि मुलगी वामिकाकडे (Vamika) बॅट दाखवत आनंद व्यक्त केला. यावेळी अनुष्काच्या कडेकर असलेल्या वामिकाकडे कॅमेरा वळला आणि तिची पहिली झलक सर्वांना पहायला मिळाली. विराट-अनुष्काने वामिकाचे फोटो आजवर कुठेच पोस्ट केले नव्हते. पापाराझींनाही त्यांनी कधी वामिकाचे फोटो क्लिक करू दिले नव्हते. त्यामुळे तिला पाहण्याची उत्सुकता चाहत्यांमध्ये होतीच. वामिकाचे फोटो सध्या सोशल मीडियावर तुफान व्हायरल होत आहेत. 'ही तर मिनी विराटच' अशा प्रतिक्रिया नेटकऱ्यांनी तिच्या फोटोवर दिल्या आहेत. सोबतच विराटच्या लहानपणीचाही फोटो सोशल मीडियावर चाहत्यांनी शेअर केला आहे. (Virat Kohli's daughter Vamika's face revealed)

कोहलीनं लेकीकडे पाहत खास अंदाजात सेलिब्रेशन केलं. दुसरीकडे अनुष्का वामिकासोबत कोहलीच्या अर्धशतकाचा आनंद साजरा करताना दिसली. वामिकाला जोपर्यंत कळत नाही तोपर्यंत तिचा चेहरा समोर येऊ नये, अशी भावना विराट-अनुष्काने व्यक्त केली होती. पण कोहलीच्या अर्धशतकानंतर कॅमेरा अनुष्का-वामिकाकडे फिरला अन् पहिल्यांदाच अनुष्कासोबत वामिकाचा चेहरा सर्वांना दिसला.

वामिकाच्या व्हायरल फोटोवरून सोशल मीडियावर अनेक मीम्सही व्हायरल होऊ लागले आहेत. अनेकांनी तिच्या प्रसिद्धीची तुलना तैमुरशी केली आहे. विराट-अनुष्काने त्यांच्या सोशल मीडियावर अकाऊंट्सवर वामिकाचे फोटो वेळोवेळी पोस्ट केले आहेत. मात्र या फोटोंमध्ये त्यांनी कधीच तिचा चेहरा दाखवला नाही. वामिकाला जोपर्यंत सोशल मीडियाची समज येत नाही, आपल्यासाठी चांगलं काय वाईट काय हे तिला समजत नाही, तोपर्यंत तिला सोशल मीडियापासून दूर ठेवण्याचा निर्णय आम्ही घेतला आहे, असं विराटने स्पष्ट केलं होतं.