Arun nalawade : नाटक, मालिका आणि चित्रपट अशा मनोरंजनाच्या तीनही माध्यमात आपल्या अभिनयाचा ठसा उमटवलेले ज्येष्ठ अभिनेते अरुण नलावडे सध्या ‘झी मराठी’ वाहिनीवरील ‘मन उडू उडू झालं’ या मालिकेत मनोहर देशपांडे ही भूमिका साकारत आहेत. त्यांच्या या भूमिकेला प्रेक्षकांची विशेष पसंती मिळत आहे. सध्या ही मालिका अत्यंत रंजक वळणावर आहे. दीपूचा झालेला उपघात, इंद्राने तिच्यासाठी लावलेली जीवाची बाजी आणि या सगळ्यात बाप म्हणून दीपूच्या पाठीशी खंबीरपणे उभे राहणारे मनोहर देशपांडे अशा एकास एक संगतीने प्रेक्षक अवाक झाले आहेत. आता दीपूचे बाबा इंद्रा आणि दीपूमधील प्रेम ओळखू शकतील का, त्यांना पाठिंबा देतील का याकडे सर्वांचे लक्ष लागले आहे. याच निमित्ताने अरुण नलावडे सकाळ 'अनप्लग' या पॉडकास्ट मध्ये सहभागी झाले होते. यावेळी त्यांनी मनातील नाराजी बोलून दाखवली. (arun nalawade exclusive interview in sakal podcast)

सध्या मोठ्या प्रमाणात तरुण पिढी मनोरंजन विश्वाकडे वळत आहे, यामध्ये अनेकांना केवळ अभिनय करायचा असतो. मग त्यासाठी नाना सायास ही तरुण मंडळी करत असतात. बहुतांशी मुलांचा मालिकेत काम करण्याकडे कल असतो. अरुण नलावडे यांनी अशा अनेक तरुण कलाकारांसोबत काम केले आहे. दोन पिढ्यांमधील स्ट्रगलमध्ये नेमका काय फरक जाणवतो, याविषयी अरुण नलावडे यांनी विचारले असता त्यांनी आपली खंत व्यक्त केली. त्यांच्या मते, 'तरुण मुलांमध्ये कमालीची ऊर्जा आहे, ताकद आहे, टॅलेंटही भरपूर आहे पण ही मंडळी समाजाकडून काहीच शिकत नाही. हे यांच्याच विश्वात रममान आहेत आणि हे ज्याला स्ट्रगल म्हणतात तो निव्वळ बेशिस्तपणा आहे. आता तो बेशिस्तपणा का तेही अरुण नलावडे यांनी सांगितले आहे, तसेच काय बदल करायला हवा याविषयीही ते बोलले आहेत. पण या सगळ्या प्रश्नांची उत्तरे तुम्हाला हवी असतील तर तुम्हाला सकाळ पॉडकास्ट ऐकावं लागेल. ज्याची लिंक खाली जोडली गेली आहे. (arun nalawade gives advice to young artist in sakal podcast interview)

या मुलाखतीच्या निमित्ताने मनोरंजन विश्वातील त्यांचे अनुभव आणि काही खटकणाऱ्या बाजू यावर अरुण नालावडे यांनी दिलखुलास संवाद साधला आहे. विशेष म्हणजे नाटक, मालिका आणि तरुण कलाकार यावर ते भरभरून बोलले आहेत. याशिवाय कलाकृती कशा असाव्यात, सामाजिक भान कसे जपावे, संस्कृतीम संस्कार याविषयीही महत्वपूर्ण संवाद त्यांनी साधला आहे.