अमेरिकेतील टेक्सासमध्ये शुक्रवारी पार पडलेल्या अॅस्ट्रोवर्ल्ड म्युझिक फेस्टिव्हलमध्ये Astroworld Festival tragedy अचानक मोठा गोंधळ आणि चेंगराचेंगरी झाली. यामध्ये आठ जणांना आपले प्राण गमवावे लागले. तर अनेक जण जखमी झाले. याच चेंगराचेंगरीत जखमी झालेली २२ वर्षीय भारती शहानी Bharti Shahani ब्रेन डेड झाल्याचं डॉक्टरांनी घोषित केलं. भारती ही टेक्सास अॅग्रिकल्चरल अँड मेकॅनिकल युनिव्हर्सिटीची विद्यार्थिनी आहे. शुक्रवारी रात्री नऊच्या सुमारास कॉन्सर्टमध्ये ही चेंगराचेंगरीची धक्कादायक घडना घडली होती. "मंचासमोरील गर्दी अचानक वाढली आणि त्या गर्दीत श्वास गुदमरून अनेकजण बेशुद्ध झाले. त्याच आठ जणांचा मृत्यू झाला", अशी माहिती ह्युस्टन फायर चीफ सॅम्युअल पी यांनी पत्रकार परिषदेत दिली.

बहीण नम्रता आणि चुलत भाऊ मोहित बेलानी यांच्यासोबत भारती या कॉन्सर्टला गेली होती. मंचासमोरील गर्दी वाढली तेव्हा त्यात तिघे हरवले. यामध्ये नम्रता आणि मोहित यांचा मोबाइल फोनसुद्धा हरवला. त्यामुळे ते भारतीला शोधू शकत नव्हते. या भयावह घटनेबद्दल मोहित 'एबीसी ह्युस्टन'ला दिलेल्या मुलाखतीत म्हणाला, "एका व्यक्तीवर अनेकजण तुटून पडत होते. जमिनीवर जणू लोकांचा खच जमा झाला होता. त्यातून बाहेर पडण्यासाठी, श्वास घेण्यासाठी आम्ही वर येण्याचा जीवापाड प्रयत्न करत होतो. भारतीला बराच वेळ श्वास घेता आलं नाही आणि त्यामुळेच मेंदुच्या नसा जवळपास ९० टक्के सुजल्या."

"भारतीचे प्राण वाचण्याची शक्यता नसल्याचं डॉक्टरांनी म्हटलंय. हे मी अद्याप माझ्या पत्नीला सांगितलं नाही. आम्ही तिच्यासाठी प्रार्थना करत आहोत. कदाचित प्रार्थनांमुळेच चमत्कार घडू शकेल", अशी प्रतिक्रिया भारतीचे वडील सनी शहानी यांनी दिली. चेंगराचेंगरीच्या घटनेनंतर भारतीला तातडीने ह्युस्टन मेथडीस्ट रुग्णालयात दाखल करण्यात आलं. मात्र रुग्णालयात नेताना तिला हृदयविकाराचा झटकाही आल्याची माहिती कुटुंबीयांनी दिली.

अॅस्ट्रोवर्ल्ड म्युझिक फेस्टिव्हलमध्ये मंचावर ट्रेविस स्कॉट परफॉर्म करत होता. त्यावेळी अचानक गर्दी मंचासमोर आली आणि चेंगराचेंगरीची घटना घडली. या कॉन्सर्टला सुमारे ५० हजारांची गर्दी जमली होती. ज्या ठिकाणी हा कॉन्सर्ट होता, त्याठिकाणी एवढे लोक जमण्याची व्यवस्था करण्यात आली नव्हती.