उत्तराखंडचे मुख्यमंत्री तीरथ सिंह रावत यांनी महिलांच्या कपड्यांवरून केलेलं वक्तव्य चांगलंच चर्चेत आहे. "फाटकी जीन्स परिधान करणाऱ्या महिला या मुलांना काय संस्कार देतील", असं विधान त्यांनी केलं होतं. यावरून त्यांच्यावर सर्वच स्तरांतून टीका झाली. आता अभिनेता आयुषमान खुरानाची पत्नी आणि लेखिका ताहिरा कश्यप हिनेसुद्धा या वादात उडी घेतली आहे. ताहिराने सोशल मीडियावर तिचा एक जुना फोटो पोस्ट करत फाटक्या जीन्सच्या वक्तव्याला तिच्या अंदाजात उत्तर दिलंय. तिचा हा फोटो सध्या सोशल मीडियावर व्हायरल होत असून त्यावर तिने दिलेलं कॅप्शन नेटकऱ्यांचा खूपच आवडल्याचं दिसून येतंय. 

बिकिनी परिधान केलेला ताहिराचा हा जुना फोटो आहे. ताहिराने कॅन्सरवर यशस्वीरित्या मात केली असून उपचारानंतरचा तिचा हा फोटो आहे. 'कमीत कमी मी फाटकी जीन्स तरी नाही घातली', असा उपहासात्मक टोला तिने उत्तराखंडच्या मुख्यमंत्र्यांना लगावला. तिच्या या फोटोला दीड लाखांहून अधिक लाईक्स मिळाले असून नेटकऱ्यांसह सेलिब्रिटींनीही त्यावर प्रतिक्रिया दिल्या आहेत. टेलिव्हिजन क्वीन एकता कपूर आणि अभिनेत्री भूमी पेडणेकर यांनी हात जोडलेला इमोजी पोस्ट केला. ताहिरा अनेक मुद्द्यांवर बेधडकपणे तिची मतं मांडते. याआधीही ती विविध मुद्द्यांवर सोशल मीडियावर व्यक्त झाली आहे. 

हेही वाचा : "डान्सदरम्यान दिग्दर्शकाने अंतर्वस्त्रापर्यंत कपडे काढण्यास सांगितले"; प्रियांकाचा मोठा खुलासा

वादानंतर मुख्यमंत्र्यांनी घेतलं नमतं
फाटक्या जीन्सवरील वक्तव्यावरून मोठा वाद निर्माण झाल्याने रावत यांनी आपलं वक्तव्य मागे घेत माघार घेतली आहे. "कोणाचाही अपमान करण्याचा माझा उद्देश नव्हता. महिलांचा सन्मान माझ्यासाठी नेहमीच सर्वांत महत्त्वाचा आहे", असं ते म्हणाले.