Bigg Boss Marathi 3: छोट्या पडद्यावरील कार्यक्रम 'बिग बॉस मराठी ३' सध्या प्रेक्षकांचं लक्ष वेधून घेत आहे. घरात दिले जाणारे टास्क प्रेक्षकांना चांगलेच पसंतीस पडत असून टास्क जिंकण्यासाठी सदस्यांची होणारी धावपळ पहायला प्रेक्षकांना आवडत आहे. बिग बॉसच्या घरात नुकतंच 'संयमाची ऐशी तैशी' हा टास्क खेळण्यात आला. या टास्कमध्ये एक टीम राक्षस बनली होती तर दुसरी टीम देवदूत बनली होती. यात राक्षस देवदूतांना काम सांगणार आणि ती कामं देवदूतांनी हसत पूर्ण करायची होती. तर या टास्कदरम्यान मीनल शाह Meenal Shah हिने प्रेक्षकांची मनं जिंकली आहेत.

'संयमाची ऐशी तैशी' या टास्कमध्ये मीरा जगन्नाथ राक्षस बनली होती तर मीनल देवदूत होती. त्यामुळे मीनलला टास्कमधून बाहेर काढण्यासाठी मीराने तिला केस कापून टक्कल करण्याचा आदेश दिला. ट्रीमरने सगळे केस काढून टक्कल करायचं असं मीराने मीनलला सांगितलं. त्यावर मीनलने देखील टक्कल करण्याची तयारी दाखवली होती. पण मीनल टक्कल करणार तेवढ्यात मीराने तिला थांबवलं. मात्र मीनलच्या या धाडसीपणाचं सोशल मीडियावर प्रचंड कौतुक होत आहे. मीनलने न घाबरता मीराचं आव्हान स्वीकारलं आणि ते पूर्ण करण्याची धमक दाखवली, याबद्दल नेटकऱ्यांनी सोशल मीडियावर मीनलचं भरभरून कौतुक केलं आहे.

एका नेटकऱ्याने कमेंट करत लिहिलं, 'जिंकलंस. तुझा खेळ पाहून खूप छान वाटलं. तू एकटी तिथे सगळ्यांवर भारी पडतेस.' आणखी एका युझरने लिहिलं, 'मीनलने जेवढ्या धाडसाने हे आव्हान स्वीकारलं त्याला सलाम. एखाद्याने यावर खूप विचार केला असता. पण मीनल तू ग्रेट आहेस.' तर दुसरीकडे मीराने मीनलला असं विचित्र काम दिल्याने नेटकरी तिला ट्रोल करत आहेत. 'मीरा तुला दुसरा टास्क देता आला असता, एक मुलगी असून दुसऱ्या मुलीला टक्कल करायला सांगतेस. तू अजुन किती खालच्या पातळीला जाणार आहेस, इतकी घाणेरडी गोष्टी फक्त तूच करू शकतेस.' असं म्हणत नेटकऱ्यांनी मीरावर राग व्यक्त केला. तर मीरासोबतच तृप्ती देसाई, विकास आणि विशालवरदेखील नेटकरी संतापले आहेत.