बिग बॉसच्या घरात Bigg Boss Marathi 3 वेगवेगळ्या स्वभावाची माणसं तब्बल ९० दिवस एकत्र राहण्यासाठी येतात. यापैकी काहींची एकमेकांसोबत गट्टी जमते तर काही एकमेकांचे कट्टर वैरी होतात. ९० दिवस कार्यक्रमात टिकून राहण्याचं आव्हान सहभागी होणाऱ्या प्रत्येक कलाकारासमोर असतं. त्यातही बिग बॉसची आज्ञा पाळत त्यांनी दिलेले टास्क इमाने इतबारे पूर्ण करत स्वत:ला सिद्ध करून दाखवायची चुरस या सगळ्याच सदस्यांमध्ये असते. नुकत्याच पार पडलेल्या एका एपिसोडमध्ये स्पर्धकांना एक टास्क देण्यात आला. यामध्ये घरी आलेल्या पाहुण्यांना सर्वांत वाईट पदार्थ तयार करून खायला द्यायचा होता. या टास्कमध्ये अक्षय वाघमारे Akshay Waghmare याने दादूस Dadus यांना कारलं, गरम मसाला, अंडं, मिरची आणि भरपूर मीठ घातलेला एक पदार्थ तयार करून दिला. विशेष म्हणजे दादूस यांनीसुद्धा कोणतीही तक्रार न करता तो पदार्थ खाल्ला. दादूसच्या खिलाडू वृत्तीची सारेच सध्या चर्चा करतायत.

दादूसला तो पदार्थ खाताना पाहून घरातील इतर सदस्यांच्या डोळ्यात पाणी आलं होतं. अखेर बिग बॉस यांनी दादूस यांना थांबवत तब्येतीची काळजी घेण्यास सांगितलं. या टास्कमध्ये दादूस यांनी प्रेक्षकांची मनं जिंकली. मात्र दादूस यांच्या पत्नीने त्यांच्या तब्येतीची काळजी व्यक्त केली. यासंदर्भात ई टाइम्सला दिलेल्या मुलाखतीत योगिता म्हणाल्या, "त्यांना ब्लड प्रेशर आणि शुगरचा त्रास आहे. असं असूनही त्यांनी टास्कमध्ये अत्यंत खारट पदार्थ खाल्ला. आम्हाला त्यांच्या तब्येतीची खूप काळजी वाटत आहे. घरी त्यांच्या जेवणात मिठाचा वापर खूप कमी केला जातो. त्यांच्यासाठी आम्ही वेगळं जेवण बनवतो. मात्र त्यांनी टास्कमध्ये तो पदार्थ कसा खाल्ला याचंच मला खूप आश्चर्य वाटतंय. ते पदार्थ खाताना घरातील काही सदस्य रडले, आमचीसुद्धा तशीच अवस्था झाली होती."

दादूस यांनी बिग बॉस मराठीमध्ये सहभागी होण्याचा निर्णय का घेतला याविषयी योगिता यांनी पुढे सांगितलं, "त्यांना ही संधी अचानकच मिळाली. ते कामात इतके व्यग्र असतात की टीव्हीवरचे कार्यक्रम फारसे पाहत नाहीत. त्यांना जेव्हा बिग बॉसची ऑफर मिळाली, तेव्हा मी आणि माझ्या मुलीने त्यांना खूप आग्रह केला. आम्ही दोघी हा कार्यक्रम नेहमी पाहतो. दुसऱ्या सिझनसाठीही त्यांना विचारण्यात आलं होतं. मात्र तेव्हा ते कामात व्यग्र होते."