'फॅमिली मॅन'मुळे समंथा-नाग चैतन्यच्या आयुष्यात घटस्फोटाचं वादळ

तेलुगू फिल्म इंडस्ट्रीमधील सर्वांत सुंदर जोडी म्हणजे समंथा रुथ प्रभू Samantha Ruth Prabhu आणि नाग चैतन्य अक्किनेनी Akkineni Naga Chaitanya. गेल्या काही आठवड्यांपासून या दोघांच्या घटस्फोटाची जोरदार चर्चा आहे. मात्र या चर्चांवर अद्याप समंथा किंवा नाग चैतन्यने कोणतीही प्रतिक्रिया दिली नाही. ट्विटरवरील काही गोष्टींवरून समंथाकडून इशारा देण्यात येत आहे, मात्र नाग चैतन्यने पूर्णपणे मौन बाळगणं पसंत केलं आहे. समंथाने सोशल मीडिया अकाऊंटवर अक्किनेनी हे आडनाव काढून टाकल्यापासून या दोघांच्या नात्यात दुरावा आल्याची चर्चा आहे. अक्किनेनी कुटुंबात नेमकं काय बिनसलंय, हे कोणालाच माहित नाही.

समंथाला लहानपणापासूनच चित्रपटांची फार आवड आहे. चेन्नईतील एका सामान्य कुटुंबात जन्मलेल्या समंथाला तिच्या दमदार अभिनयकौशल्यामुळे प्रसिद्धी मिळाली. लग्नानंतरही तिने काम सुरू ठेवलं. समंथाचे काही फोटोशूट्स नेटकऱ्यांचे लक्ष वेधून घ्यायचे. चैतन्य आणि नागार्जुन यांना ही गोष्ट खटकत होती. या दोघांनी तिच्याशी याबद्दल बोलण्याचा प्रयत्न केला, मात्र त्याने काही फरक पडला नाही. 'टाइम्स ऑफ इंडिया'ने दिलेल्या वृत्तानुसार, इथूनच दोन्ही कुटुंबांमध्ये वादाला सुरुवात झाली. याचवेळी समंथाने 'फॅमिली मॅन २' या वेब सीरिजची ऑफर स्वीकारली होती. या सीरिजमध्ये तिने दमदार भूमिका साकारली होती. तिच्या अभिनयकौशल्याचं प्रेक्षक-समीक्षकांकडून कौतुक झालं. मात्र हीच गोष्ट अक्किनेनी कुटुंबाला आवडली नाही. करिअरसंदर्भातील समंथाच्या निवडी त्यांना खटकू लागल्या आणि हळूहळू या दोघांमध्ये दुरावा वाढू लागला.

नात्याला आणखी एक संधी देण्यासाठी समंथा आणि नाग चैतन्यने वैवाहिक सल्लागारांची मदत घेतली. मात्र हे दोघंही घटस्फोटाच्या निर्णयावर ठाम असल्याचं म्हटलं जात आहे. पुढील दोन-तीन महिन्यांत घटस्फोटाची प्रक्रिया पूर्ण होणार असल्याची माहिती 'टाइम्स ऑफ इंडिया'ने दिली. घटस्फोटानंतर समंथाला जवळपास ५० कोटी रुपये पोटगी म्हणून मिळणार असल्याचंही म्हटलं जात आहे.