Bobby Deol Kanguva News: बॉबी देओलने २०२३ मध्ये 'ॲनिमल' सिनेमातून लोकांचं मनोरंजन केलं. बॉबीने अबरारची खलनायकी भूमिका साकारून सर्वांच्या मनावर राज्य केलं. आज बॉबी देओलचा वाढदिवस.

बॉबीच्या वाढदिवसानिमित्त साऊथमधील बहुप्रतिक्षित 'कंगुवा' सिनेमाच्या टिमने त्याचा सिनेमातील लूक शेअर केलाय.

अभिनेता सुरिया त्याचा पुढील तामिळ चित्रपट 'कंगुवा'साठी सज्ज झाला आहे. शनिवारी, 27 जानेवारी रोजी सोशल मीडियावर चित्रपटातील खलनायकी भूमिकेत असलेला अभिनेता बॉबी देओलचा लूक शेअर करण्यात आलाय. बॉबी सिनेमात उधीरन ही भूमिका साकरणार आहे,

बॉबीचा लूक शेअर करताच पोस्टमध्ये लिहिले आहे की, "निर्दयी. शक्तिशाली. अविस्मरणीय. आमचा #उधीरन, #लॉर्ड बॉबी सरांना वाढदिवसाच्या शुभेच्छा."

सिवा दिग्दर्शित कंगुवा या चित्रपटात सुरिया, दिशा पटानी, नटराजन सुब्रमण्यम, जगपती बाबू, योगी बाबू, रेडिन किंग्सले, कोवई सरला इत्यादी लोकप्रिय कलाकार झळकणार आहेत.

चित्रपटाचे संगीत देवी श्री प्रसाद यांनी दिले आहे आणि निर्मात्यांनी याआधीच चित्रपटातील एक टिझर आणि पोस्टर शेअर केलंय. ज्यात चित्रपटातील सुरियाचा अंगावर काटा आणणारा लूक दिसून येतो.

'कंगुवा' चित्रपट 1500 वर्षांपूर्वीच्या काळात सेट केला गेला आहे. या सिनेमात संपूर्ण भारतातील भिन्न संस्कृती दर्शविणारे घटक दिसणार आहेत. शिवाय काल्पनिक कथांमध्ये प्राचीन तमिळ संस्कृतीशी संबंधित अनेक संदर्भ आणि तथ्ये पाहायला मिळणार आहेत.

हा चित्रपट 2024 च्या उन्हाळी सुट्ट्यांमध्ये चित्रपटगृहांमध्ये प्रदर्शित होण्याची अपेक्षा आहे. याशिवाय कंगुवा 10 वेगवेगळ्या भाषांमध्ये 3D मध्ये प्रदर्शित होईल. या चित्रपटातून दिशा पटानी आणि बॉबी देओल साऊथ इंडस्ट्रीत पदार्पण करत आहेत.