बॉलिवूडमधील प्रसिद्ध अभिनेता सैफ अली खान (saif ali khan) त्याच्या वैयक्तिक आयुष्यामुळे नेहमी चर्चेत असतो. सैफने 1991 साली अभिनेत्री अमृता सिंगसोबत (amrita singh) लग्नगाठ बांधली. त्यानंतर 2004 मध्ये सैफ आणि अमृताचा घटस्फोट झाला. 'टशन' या चित्रपटाच्या शूटिंगदरम्यान सैफ अभिनेत्री करीना कपूरच्या (kareena kapoor) प्रेमात पडला. सैफ व करीनाने २०१२ मध्ये लग्न केलं. या लग्नाच्याच दिवशी सैफने पूर्वाश्रमीची पत्नी अमृताला पत्र लिहिले होते. या पत्राबद्दल सैफने 'कॉफी विथ करण' या कार्यक्रमामध्ये सांगितले होते.

'कॉफी विथ करण' या कार्यक्रमामध्ये सैफने मुलगी सारा अली खानसोबत हजेरी लावली होती. त्यावेळी त्याने सांगितले होते की, 'अमृताला मी भावनिक पत्र लिहिलं होतं. अर्थात आम्ही जो चांगला काळ व्यतित केला त्याबद्दल आणि भविष्याबद्दल हे पत्र होतं. पत्र लिहून झाल्यानंतर मी ते करीनाला दाखवलं होतं. तिनं खूप शांतपणे ते पत्र वाचलं. हे पत्र मी अमृताला पाठवलंच पाहिजे असंही तिनं मला सांगितलं. तिनं मला तेव्हा पाठिंबा दिला होता.'

२० डिसेंबर २०१६ रोजी करीना आणि सैफच्या घरी एका चिमुकल्याचे आगमन झाले. त्याचे नाव त्यांनी तैमुर असे ठेवले. तैमुर सध्या चार वर्षांचा आहे. ऑगस्ट २०२० मध्ये करीना गरोदर असल्याची आनंदाची बातमी सैफ अली खानने सोशल मीडियावर दिली होती. २१ फेब्रुवारी २०२१ साली सैफ आणि करीनाला दुसरा मुलगा झाला. त्याचे नाव त्यांनी जहांगीर असे ठेवले आहे.