Atal Bihari Vajpayee Biopic Name:: प्रसिद्ध अभिनेता पंकज त्रिपाठी भारताचे माजी पंतप्रधान अटल बिहारी वाजपेयी यांच्या बायोपिक मध्ये काम करत आहे ही गोष्ट आता सर्वप्रचलित आहे. पंकज त्रिपाठीचे चाहते आता त्याला अटल बिहारी वाजपेयी यांच्या भूमिकेत पाहण्यासाठी आतुर आहेत. पंकज त्रिपाठीनं एका नव्या पोस्टच्या माध्यमातून 'मै अटल हूं..' या आपल्या अटल बिहारी वाजपेयी यांच्यावरील बायोपिकचं नाव सांगत लवकरच हा सिनेमा आपल्या भेटीस येतोय हे सूचित केलं आहे. या सिनेमाचं दिग्दर्शन आपला मराठमोळा दिग्दर्शक रवी जाधव करत आहे. (Atal Bihari Vajpayee Biopic, Main Atal Hoon...pankaj tripathi post)

पंकज त्रिपाठीनं केलेल्या पोस्टमध्ये त्यानं लिहिलं आहे की,'' मनात रोमांच दाटून आलाय, थोडीशी भीती देखील वाटतेय,मनात अनेक भावनांचा कल्लोळ आहे, पण सिनेमाप्रतीची निष्ठा बळ वाढवतेय. आणि हा सगळा उत्साह अटलजींना समर्पित...आता मै अटल हूं..लवकरच येतोय.

अटल बिहारी वाजपेयी यांच्या व्यक्तिमत्त्वाला पडद्यावर साकार करणं म्हणजे एखाद्या कठीण परिक्षेला बसण्यासारखंच आहे. पण या परिक्षेसाठी अटलजींचे आशीर्वाद आमच्या सोबत आहेत. आणि आम्हाला अटळ विश्वासही आहे.

तेव्हा 'मै अटल हूं' ही आमची बायोपिक लवकरच येतेय...'',अशी एकंदरीत पोस्ट आहे.

पंकज त्रिपाठीच्या या पोस्टवर अनेक चाहत्यांनी कमेंट करत अभिनेत्याला शुभेच्छा दिल्या आहेत. अटलजींची व्यक्तिरेखा साकारण्यासाठी पंकजपेक्षा दुसरा कोणताच कलाकार योग्य नसता अशी देखील कमेंट काही जणांनी केली आहे. हा सिनेमा अटल बिहारी वाजपेयी यांच्या जन्मदिनी म्हणजे २५ डिसेंबर,२०२३ रोजी प्रदर्शित केला जाणार आहे.