मुंबई उच्च न्यायालयाकडून व्यावसायिक राज कुंद्रा Raj Kundra आणि त्याचा सहकारी रायन थोरपे Ryan Thorpe यांना दिलासा मिळाला नाही. पॉर्न फिल्म रॅकेटप्रकरणी दंडाधिकाऱ्यांद्वारे मंजूर केलेल्या आदेशांना आव्हान देत कोठडीतून सुटका करण्याची याचिका या दोघांनी उच्च न्यायालयात दाखल केली होती. मात्र उच्च न्यायालयाने ही याचिका फेटाळली आहे. न्यायमूर्ती ए. एस. गडकरी यांनी आदेश सुनावताना म्हटलं, "महानगर दंडाधिकाऱ्यांनी सुनावलेली कोठडी कायद्याच्या अनुरुप आहे आणि त्यात कोणत्याही हस्तक्षेपाची गरज नाही." पोलिसांनी केलेली अटक बेकायदेशीर असून त्याची कायदेशीर पूर्वसूचना देण्यात आली नाही. त्यामुळे महानगर दंडाधिकारींनी दिलेला रिमांडही बेकायदेशीर आहे असा दावा कुंद्राने याचिकेत केला होता.

पोलिसांनी माहिती तंत्रज्ञान कायद्यानुसार लावलेले आरोपही चुकीचे असून त्याप्रमाणे कोणतेही कृत्य केलेले नाही, असा बचाव याचिकेत केला आहे. विशेष म्हणजे जो कथित कंटेंट अश्लील म्हणून पोलिसांकडून दाखवला जात आहे, तो कोणताही थेट अश्लील वर्तन किंवा अश्लील संबंध नाहीत. उलट हा कंटेंट शॉर्टफिल्म्सच्या माध्यमातून दाखविला असून तो त्या मागणीप्रमाणे विशिष्ट इच्छुक लोकांसाठी तयार केलेला आहे, असा दावा यामध्ये केला आहे. त्यामुळे जरी पोलिसांनी केलेला दावा खरा मानला तरी हा आरोप कलम 67 मध्ये येऊन जामिनपात्र गुन्हा होतो, असे याचिकेत म्हटले आहे. त्यामुळे ता. 20 रोजी दंडाधिकारी न्यायालयाने दिलेला पोलीस रिमांडचा आदेश रद्द करावा, अशी मागणी केली आहे.

कुंद्रा आणि त्याचा साथीदार रायन थोरपे सध्या न्यायालयीन कोठडीत आहेत. अश्लील चित्रफित निर्मिती प्रकरणी गुन्हे शाखेने कुंद्राला मुख्य सूत्रधार दाखवले आहे. त्याच्या खात्यात दर दिवशी लाखो रुपये जमा होत होते आणि हॉटशॉट्स अॅप्सच्या माध्यमातून हा प्रकार चालविला जात होता, असे पोलिसांनी सांगितले आहे.