मुंबई : बॉलिवुड अभिनेता सलमान खान आणि त्याचा अंगरक्षकाने पत्रकाराशी गैरवर्तन केल्याच्या प्रकरणात आज (३० मार्च) मुंबई उच्च न्यायालयाकडून मोठा दिलासा मिळाला आहे. मुंबई उच्च न्यायालयाने अभिनेता सलमान खान आणि त्याच्या अंगरक्षकांविरोधातील पत्रकाराचा फोन हिसकावल्याचा आणि गैरवर्तन केल्याचा खटला रद्द केला आहे.

नेमकं प्रकरण आहे काय?

हे संपूर्ण प्रकरण हे २०१९ सालचे असून मुंबईच्या अंधेरी परिसरात सायकल चालवत असताना एका कथित पत्रकाराने सलमान खानचे फोटो घेण्याचा प्रयत्न केला. यानंतर सलमानच्या अंगरक्षकाने त्याला हटकलं तेव्हा त्या पत्रकाराने त्यांच्याशी हु्ज्जत घालायला सुरूवात केली. त्यावेळी सलमान आणि त्याच्या अंगरक्षकांनी आपल्याला शिवीगाळ केली आणि धक्काबुक्की करत आपला फोन हिसकावून घेतल्याची तक्रार या पत्रकाराने केली .

सलमानला मोठा दिलासा..

या प्रकरणात अशोक पांडे या पत्रकाराने अंधेरीच्या डीएन नगर पोलिसस्टेशनमध्ये तक्रार दिल्यानंतर हे प्रकरण कोर्टात पोहचलं. अंधेरी कोर्टाने समन्स जारी करत सलमानला कोर्टात उपस्थित राहण्यासाठी बोलवलं. यानंतर सलमान खानने मुंबई उच्च न्यायालयात दोन याचिका दाखल केल्या या दोन्ही याचिकांवर स्वतंत्र्य सुनावणी झाली आणि या दोन्ही याचिका स्विकारत हायकोर्टाने हे सगळं प्रकरण रद्द केलं आहे.

त्यामुळे अंधेरी कोर्टातील याचिका आणि सलमानला बजावण्यात आलेलं समन्स रद्द करण्यात आलं आहे. यामुळे सलमान खान आणि त्याच्या सुरक्षारक्षकाला मोठा दिलासा मिळाला आहे.