Carl Weathers Hollywood Actor passed away : रॉकी आणि प्रीडेटर सारख्या चित्रपटांमध्ये दमदार अभिनय करुन चाहत्यांचे लक्ष वेधून घेणाऱ्या हॉलीवूडचे कार्ल वेदर्स (Carl Weathers Death) यांचे निधन झाल्याची बातमी समोर आली आहे. वयाच्या ७६ व्या वर्षी त्यांनी अखेरचा श्वास घेतला आहे. त्यांच्या मॅनेरजनं त्यांचे निधन झाल्याच्या बातमीला दुजोरा दिला आहे.

राहत्या घरात कार्ल वेदर्स यांचे निधन झाले असून अद्याप त्यांच्या निधनाचे कारण समोर आलेले नाही. सिल्वेस्टार स्टॅलोनच्या रॉकी आणि प्रीडेटर (Rocky And Predator Movie) सारख्या चित्रपटांमध्ये कार्लनं केलेल्या भूमिका प्रेक्षकांच्या पसंतीच्या होत्या. त्यांच्या जाण्यानं हॉलीवूडवर मोठी शोककळा पसरली आहे.

कार्ल यांनी चित्रपट आणि वेगवेगळ्या टीव्ही शो मध्ये त्यांनी काम केले होते. आपल्या हटके स्टाईल आणि अभिनयाच्या वेगळ्या शैलीमुळे ते नेहमीच कौतुकाचा विषय राहिले. याविषयी जागरणनं वृत्त दिले आहे. केवळ कला नव्हे तर क्रीडा क्षेत्रात देखील त्यांनी मोठे योगदान दिल्याचे सांगण्यात येते. त्यांच्या निधनानंतर हॉलीवूडमधील अनेक सेलिब्रेटींनी त्यांना आदरांजली वाहिली आहे.

कार्ल यांच्या निधनानंतर त्यांच्या कुटूंबियांची प्रतिक्रिया समोर आली आहे. त्यात त्यांनी म्हटले आहे की, कार्ल हे आमच्यासाठी एका मोठ्या मार्गदर्शकासारखे होते. ते आमचे चांगले मित्र, भाऊ, वडील यांच्या भूमिकेत नेहमीच आदर्शव्रत राहिले. रॉकी या चित्रपटात काम करण्यापूर्वी कार्ल हे एक फुटबॉलपटू होते. त्यांना बॉक्सिंगचा कोणताही अनुभव नव्हता. त्यांनी रॉकी मध्ये अपोलो क्रीडची भूमिकेसाठी ऑडिशन दिली होती.

त्यानंतर त्यांनी ऑस्कर विजेत्या रॉकीच्या पुढील तीनही चित्रपटांमध्ये काम केले. त्याची चाहत्यांकडून वाहवा झाली. कार्ल यांनी नेहमीच प्रसिद्ध मुष्टियोद्धा मोहम्मद अलीला आपला आदर्श मानले. त्याचा उल्लेख त्यांनी अनेक मुलाखतींमधून केले होते.