Josephine Chaplin Death News: दिग्गज कॉमेडी कलाकार चार्ली चॅप्लिन आज या जगात नसला तरीही त्याचे सिनेमे लहानांपासुन मोठ्यांपर्यंत सर्वजण आवडीने पाहतात. चार्ली चॅप्लिनच्या कुटूंबातुन एक मोठी बातमी समोर येतेय.

चार्ली चॅप्लिनची मुलगी आणि अभिनेत्री जोसेफिन चॅप्लिन हिचे वयाच्या ७४ व्या वर्षी निधन झाले आहे. व्हरायटी मिडीयानुसार, 13 जुलै रोजी पॅरिसमध्ये जोसेफिन चॅप्लिनचा मृत्यू झाला.

(Charlie Chaplin's daughter Josephine Chaplin dead at 74)

बाबा चार्ली चॅप्लिनसोबत केलेली अभिनय कारकीर्दीला सुरुवात

जोसेफिनने तिचे वडिल चार्ली चॅप्लिनच्या पावलावर पाऊल टाकले आणि स्वतःची अभिनय कारकीर्द सुरू केली. ती तिच्या वडिलांसोबत "लाइमलाइट" सिनेमात अगदी लहान वयात सुद्धा दिसली होती, ज्याचे लेखन आणि दिग्दर्शन स्वतः चॅप्लिन यांनी केले होते.

अभिनेत्री जोसेफिनने 1967 मध्ये "अ काउंटेस फ्रॉम हाँगकाँग" या चॅप्लिन चित्रपटात काम केले. याशिवाय "द मॅन विदाऊट अ फेस" आणि "शॅडोमन" अशा सिनेमांमध्ये जोसेफिन झळकली आहे.

जगभरातल्या फॅन्सकडून श्रद्धांजली

जोसेफिनने 1969 मध्ये ग्रीक व्यावसायिक निक्की सिस्टोवारीसशी लग्न केले. पुढे 1977 मध्ये या जोडीचा घटस्फोट झाला. तिने 1989 मध्ये तिचे दुसरे पती, पुरातत्वशास्त्रज्ञ जीन-क्लॉड गार्डिन यांच्याशी लग्न केले. 2013 मध्ये तिचे दुसरे पती गार्डिनचं निधन झालं.

जोसेफिनने वडील चार्ली चॅप्लिन यांच्या अभिनयाचा समृद्ध वारसा तिच्या परीने पुढे चालु ठेवला. चार्ली चॅप्लिनच्या कुटूंबाबद्दल कायमच लोकांना सहानुभुती आणि प्रेम वाटलंय. जोसेफिनच्या निधनानंतर तिला जगभरातल्या फॅन्सनी श्रद्धांजली वाहिली आहे.