Tim Sale Passes Away : 'द लाँग हॅलोवीन'सारख्या प्रतिष्ठित कथांसाठी प्रसिद्ध झालेले कॉमिक बुक आर्टिस्ट (Comic Book Artist Tim Sale) टिम सेल यांचं आज शुक्रवार, 17 जून रोजी निधन झालं. त्यांच्या मृत्यूबाबत फारशी माहिती समोर आलेली नाहीय. ते 66 वर्षांचे होते.

टिम सेलनं बॅटमॅन: द लाँग हॅलोवीन, बॅटमॅन नॉयर : डार्क व्हिक्ट्री, कॅटवुमन : व्हेन इन रोम यासारख्या कॉमिक बुक लेखक जेफ लोएबसह बॅटमॅन कॉमिक्सचं अनेक चित्रण केलं आहे. त्यांच्या मृत्यूची माहिती ट्विटच्या माध्यमातून समोर आलीय. हे ट्विट त्यांच्या अधिकृत ट्विटर अकाऊंटवरून करण्यात आलंय. गेल्या अनेक दिवसांपासून प्रकृती अस्वास्थ्यामुळं त्यांना रुग्णालयात दाखल करण्यात आलं होतं.

दरम्यान, टिम सेलच्या निधनानंतर डीसी कॉमिक्सनंही त्यांच्या आठवणी जाग्या केल्या आहेत. डीसी कॉमिक्सनं आपल्या ट्विटमध्ये लिहिलंय, 'टिम सेल एक अविश्वसनीय कलाकार होता. त्याच्या पेज डिझाइननं कॉमिक बुक स्टोरीटेलिंगबद्दल संपूर्ण पिढीचा विचार बदलला. टिमच्या कुटुंबीयांसोबत आणि मित्रांसोबत आमच्या संवेदना कायम असून टिमची उणीव आपल्या सगळ्यांनाच जाणवेल.'