'द काश्मिर फाईल्स'(The Kashmir Files) हा सिनेमा अनेक कारणांमुळे चर्चेत आहे. वादांनी तर या सिनेमाला घेरलेलेच आहे. द काश्मिर फाईल्स सिनेमाचे दिग्दर्शक विवेक अग्निहोत्री(Vivek Agnihotri) यांनी भोपाळी नागरिकांना समलिंगी म्हणून संबोधल्याबद्दल एक नवीन वाद निर्माण झाला होता. आता याच वक्तव्यावरुन 'द काश्मिर फाईल्स'चे दिग्दर्शक विवेक अग्निहोत्री यांच्याविरोधात तक्रार दाखल करण्यात आली आहे. मुंबईत मनोरंजन बातम्यांचे कव्हरेज करणारा पत्रकार रोहित पांडे(Rohit Pande) नं ही तक्रार वर्सोवा पोलिस ठाण्यात दाखल केली आहे. रोहित पांडेचे वकील अली काशिफ खान देशमुख यांच्यामार्फत ही तक्रार दाखल करण्यात आली आहे. आयपीसी सेक्शन 153A,153B,295A,500,505(2) अंतर्गत ही तक्रार दाखल करण्यात आली आहे.

विवेक अग्निहोत्री यांनी एका कार्यक्रमाच्या निमित्तानं वादग्रस्त विधान केलं होतं. त्यांनी भोपाळी हे समलैंगिक असल्याचे म्हटले होते. त्यावरुन त्यांना नेटकऱ्यांनी मोठ्या प्रमाणात ट्रोलही केले. त्यांना वेगवेगळ्या कमेंटस् देऊन त्यांच्यावर टीकाही करण्यात आली. अग्निहोत्री यांचे म्हणणे होते की, ''भोपाळी या शब्दाचा अर्थ होमोसेक्शुअल असा आहे. आपल्यापैकी अनेकांना त्याचा अर्थ माहिती नाही. त्यामुळे मी जे काही बोलले आहे त्याचा चूकीचा अर्थ काढला जात आहे''.

या तक्रारीत तक्रारदार असलेल्या पत्रकाराच्या वकिलांनी काही मुद्दे स्पष्ट करत म्हटलं आहे की,माझ्या अशिलाला सिनेमाविषयी प्रेम आहे. त्यात दाखवलेल्या सत्य घटनेला त्यानं आपल्या पत्रकारितेच्या माध्यमातून लोकांपर्यंत पोहोचवण्याचं कामही केलेलं आहे. पण तो स्वतः भोपाळचा रहिवासी आहे. त्याला आपल्या शहराचा,तिथल्या लोकांचा अभिमान आहे. त्यामुळे विवेक अग्निहोत्री यांनी तिथल्या लोकांना समलिंगी संबोधल्यानं आपल्या भावना दुखावल्या आहेत. आणि त्याविरोधात आपण ही तक्रार दाखल करत आहोत. विवेक अग्निहोत्री यांनी आपल्या वक्तव्याचा चुकीचा अर्थ सोशल मीडियावर लावल्यानंतर स्पष्टिकरण दिलं होतं. पण आता चक्क तक्रार दाखल झालीय. त्यामुळे वादांचा ससेमिरा द काश्मिर फाईल्सच्या मागे सुरूच असल्याचं चित्र पुन्हा दिसून आलं आहे.