पिंपरी - मराठी मालिकेतील अभिनेता योगेश सोहनी (Yogesh Sohani) यांना धाक दाखवून लुटणाऱ्या सराईत गुन्हेगाराला (Criminal) पिंपरी-चिंचवड पोलिसांच्या (Police) खंडणी विरोधी पथकाने अटक (Arrested) केली आहे. (Criminal arrested for Robbing Actor)

योगेश सुरेश गिरी (वय ३७, रा. नऱ्हे आंबेगाव, कात्रज) असे आरोपीचे नाव आहे. मराठी मालिकेतील अभिनेते योगेश माधव सोहनी (वय ३२, रा. मुंबई) हे शनिवारी (ता.८) कारमधून पुणे-मुंबई द्रुतगती मार्गाने मुंबईहून पुण्याकडे जात होते. दरम्यान, सोमाटणे उड्डाण पुलाजवळील बाह्यमार्ग येथे मोटारीतून आलेल्या आरोपीने त्यांना हात दाखवून थांबविले. 'तुझ्या गाडीने अपघात केला असून, यात एक जण जखमी झाला आहे. याबाबत आपण पोलिसांत तक्रार देणार असून, पोलिस तक्रारीतून वाचवण्यासाठी सव्वा लाख रुपये देण्याची मागणी केली.

दरम्यान, सोहनी यांना सोमाटणे येथील एटीएममधून पन्नास हजार रुपये काढून देण्यास भाग पाडले. पैसे हातात मिळताच आरोपी मोटारीसह पसार झाला. याप्रकरणी शिरगाव पोलिसात गुन्हा दाखल होता. दरम्यान, खंडणी विरोधी पथक रेकॉर्डवरील गुन्हेगारांची माहिती घेत असताना सोहनी यांना लुटणारा आरोपी गिरी असून तो पाषाण-सुसगाव रोड येथे आला असल्याची माहिती पथकाला मिळाली. त्यानुसार सापळा रचून पोलिसांनी त्याला ताब्यात घेतले. गिरी हा सराईत गुन्हेगार असून त्याच्यावर पिंपरी -चिंचवड, पुणे शहर, पुणे ग्रामीण हद्दीत चोरी, जबरी चोरी, खंडणी व फसवणुकीचे एकूण १७ गुन्हे दाखल आहेत.