कोरोना महामारीच्या दुसऱ्या लाटेत अनेक सेलिब्रिटींना त्या विषाणूची लागण झाली होती. त्यापैकीच एक म्हणजे अभिनेत्री दीपिका पदुकोण (Deepika Padukone). दीपिकासोबतच तिचे वडील प्रकाश, आई उज्वला आणि बहीण अनिषा हे सुद्धा कोविड पॉझिटिव्ह होते. गेल्या वर्षी एप्रिलमध्ये दीपिकाच्या कुटुंबीयांनी कोरोनाचा सामना केला. याबद्दल दीपिका नंतर फारशी कुठे व्यक्त झाली नाही. मात्र नुकत्याच दिलेल्या एका मुलाखतीत, तिने त्याच्या परिणामांविषयी सांगितलं. कोविडमधून दीपिका काही आठवड्यांत बरी झाली होती. मात्र त्यानंतर तिने जवळपास दोन महिने कामातून ब्रेक घेतला होता. तिचं मन कामासाठी पूर्णपणे तयार नव्हतं आणि तो खूप कठीण काळ होता, असं दीपिकाने सांगितलं. (Covid-19 battle)

'फिल्म कम्पॅनियन'ला दिलेल्या मुलाखतीत दीपिका म्हणाली, "कोविडचा सामना केल्यानंतर माझं आयुष्य बदललं, कारण शारीरिकदृष्ट्या मी स्वत:ला ओळखूच शकत नव्हते. मला वाटतं औषधं आणि स्टेरॉइट्सचा परिणाम होता. कोविडमध्ये तुम्हाला तुमचं शरीर, तुमचं मन यांचं संतुलन राखता येत नाही." दीपिकाने सांगितलं की कोरोनामुळे तिच्यावर तितकासा परिणाम झाला नाही, जितका तो होऊन गेल्यानंतर त्याचा परिणाम झाला. त्यामुळे तिला कामातून ब्रेक घ्यावा लागला. "मला असं वाटलं की जेव्हा मला आजार झाला तेव्हा मी ठीक होते, पण त्यानंतर, माझं डोकं नीट काम करत नसल्यामुळे मला दोन महिन्यांची सुट्टी घ्यावी लागली. माझ्यासाठी हा काळ खूप कठीण होता," असं ती पुढे म्हणाली.

दीपिकाचा 'गेहराइयाँ' हा चित्रपट प्रदर्शनाच्या प्रतीक्षेत आहे. शकुन बत्रा दिग्दर्शित या चित्रपटात सिद्धांत चतुर्वेदी, अनन्या पांडे आणि धैर्य कारवा यांच्याही भूमिका आहेत. येत्या ११ फेब्रुवारी रोजी हा चित्रपट अॅमेझॉन प्राइम व्हिडीओवर प्रेक्षकांच्या भेटीला येणार आहे.