'दिया और बाती’ मधील संध्या बिंदणीची भूमिका साकारणाऱ्या दीपिका सिंह हिच्या आईला करोनाची लागण झाली आहे. दीपिकाने सोशल मीडियावर एक व्हिडीओ शेअर करत ही माहिती दिली. सोबतच तिने दिल्ली सरकार आणि मुख्यमंत्री अरविंद केजरीवाल यांच्याकडे मदतीची मागणी केली आहे. दीपिकाच्या आईची करोना टेस्ट पॉझिटिव्ह आल्यानंतरही त्यांना रिपोर्ट न दिल्यामुळे त्यांच्या उपचारांमध्ये अडथळा येत असल्याचे दीपिकाने यावेळी सांगितल आहे.

गेल्या काही दिवसांपूर्वी दिपिकाने इन्स्टाग्रामवर एक व्हिडीओ शेअर केला. त्या व्हिडीओमध्ये तिने तिच्या कुटुंबियांची आणि आईच्या परिस्थितीबद्दल सांगितलं की, काही दिवसांपूर्वी माझ्या आईची लेडी हार्डिंग हॉस्पिटल येथे करोना चाचणी करण्यात आली.यावेळी तिचे रिपोर्ट्स पॉझिटिव्ह आले आहेत.परंतु अद्यापही हे रिपोर्ट आमच्या हातात मिळालेले नाहीत.

या विषयासंदर्भात रुग्णालयात संपर्क केला असता त्यांनी केवळ रिपोर्टसचे फोटो काढण्यास सांगितले. मात्र रिपोर्ट हातात दिले नाही. त्यामुळे रिपोर्ट अभावी माझ्या आईवर कोणत्याही रुग्णालयात उपचार करत नाही आहेत. त्यामुळे मुख्यमंत्री अरविंद केजरीवाल आणि दिल्ली सरकार कृपया माझी मदत करा. तसेच दिल्लीत माझं मोठं कुटुंब आहे. जवळपास ४५ लोकं या कुटुंबात राहतात. त्यामुळे आईला झालेल्या करोनाची लागण कुटुंबीयांना होण्याची शक्यता आहे. त्यामुळे कृपया माझी मदत करा.

हेही वाचा :  या अभिनेत्रीला करोनाची लक्षणं, कोण आहे ती अभिनेत्री.. जिची करोना चाचणीच कोणी करेना

दरम्यान, दिल्लीतील कोणत्याच रुग्णालयात जागा नसल्यामुळे तिच्या आईला कोणतंही रुग्णालय अॅडमीट करुन घेण्यास तयार नाही. त्यामुळे सध्या घरीच तिच्या आईवर उपचार सुरु असल्याचं सांगत तिने चिंता व्यक्त केली आहे.असे दीपिकाने या व्हिडीओमध्ये सांगितले आहे.