मल्याळम दिग्दर्शक अली अकबर (Ali Akbar) यांनी इस्लाम धर्माचा त्याग करत असल्याचं जाहीर केलं. तमिळनाडूमधील कुन्नूर इथं लष्कराचं हेलिकॉप्टर कोसळून झालेल्या भीषण अपघातात संरक्षण दलाचे प्रमुख (सीडीएस) जनरल बिपीन रावत (Bipin Rawat) आणि त्यांच्या पत्नीसह १३ जणांचा बुधवारी मृत्यू झाला. या दुर्घटनेनंतर मुस्लीम समाजातील काहींनी स्माइली इमोजी सोशल मीडियावर पोस्ट केल्या होत्या. या कृत्याच्या निषेधार्थ अली अकबर आणि त्यांनी पत्नी ल्युसायमा यांनी मुस्लीम धर्माचा त्याग करून हिंदू धर्माचा स्वीकार करणार असल्याचं जाहीर केलं.

मुस्लीम नेत्यांवर व्यक्त केली नाराजी

मुस्लीम धर्मातील वरिष्ठ नेत्यांनीही अशा कृत्याचा निषेध नोंदवला नाही. भारतीय संरक्षण दलाच्या शौर्यवान आणि वरिष्ठ अधिकाऱ्यांच्या निधनासंदर्भातील अशा प्रतिक्रिया स्वीकारल्या जाऊ शक नाही, असं अली अकबर म्हणाले. त्यांनी यांसंबंधि फेसबुकवर व्हिडीओ पोस्ट केला. "मला जन्मापासून मिळालेली ओळख मी फेकून देतोय. आजपासून मी मुस्लीम नाही तर भारतीय आहे. भारताविरोधात स्माइली पोस्ट करणाऱ्या हजारो लोकांविरोधात ही माझी प्रतिक्रिया आहे", असं ते म्हणाले.

अली अकबर यांच्या निर्णयावर सोशल मीडियावर संमिश्र प्रतिक्रिया येऊ लागल्या. काहींनी त्यांचं समर्थन केलं तर काहींनी त्यांच्या विरोधात प्रतिक्रिया दिल्या. धर्मांतर करण्याच्या शासकीय प्रक्रिया पूर्ण करून पत्नीसह हिंदू धर्मात प्रवेश करणार असल्याचं अली अकबर म्हणाले. मात्र दोन्ही मुलींना धर्मांतर करण्याची सक्ती करणार नसून त्यांनी त्यांचा निर्णय घ्यायचा आहे, असंदेखील त्यांनी स्पष्ट केलं.