अभिनेत्री जॅकलीन फर्नांडिसच्या(Jacqueline Fernandez) अडचणीत आता वाढ झाली आहे. तिला ८ डिसेंबर रोजी दिल्लीत हजर राहण्याचे ईडीने समन्स बजावले आहे. महागडी जनावरं गिफ्ट घेणं तिला आता महागात पडले आहे. सुकेश चंद्रशेखर प्रकारणात जॅकलिनचे नाव समोर आले आहे. मुंबई विमानतळावर ईडीने तिला थांबवले होते. त्यानंतर आता ८ डिसेंबर रोजी दिल्लीत हजर राहण्याचे ईडीने तिला समन्स बजावले आहे. २०० कोटींच्या मनी लॉंड्रिंग प्रकरणाची आता खोलवर जाऊन चौकशी होणार आहे.

सुकेशने जॅकलिनला कोटींची गिफ्ट्स दिली होती. एका कार्यक्रमासाठी दुबईला जात असताना ईडीच्या अधिकाऱ्यांनी मुंबई विमानतळावर काल तिला थांबवले होते. सुकेश चंद्रशेखर (Sukesh ChandraShekhar) याच्या २०० कोटी रुपयांच्या खंडणी प्रकरणात जॅकलिन फर्नांडिसची ईडीकडून चौकशी होणार आहे. सुकेश चंद्रशेखर या उद्योगपतीने एकूण ५ जनावरं जॅकलिनला गिफ्ट म्हणून दिल्याचं समोर आलं होतं. तिला दिलेल्या अरबी घोड्याची किंमत तब्बल ५२ लाख आणि प्रत्येकी ९ लाख रुपये किंमत असलेली अशा एकूण ३६ लाखांच्या ४ पर्शियन मांजरांचाही समावेश आहे.

जॅकलीन आणि सुकेशचा एक फोटोदेखील समोर आला आहे. हा फोटो समोर आल्यानंतर जॅकलीन आणि सुकेश रिलेशनशिपमध्ये असल्याचा दावा करण्यात आला होता. दिल्लीच्या तिहार तुरुंगातून २०० कोटी रुपये वसूल केल्याप्रकरणी ईडीने शनिवारीच आरोपपत्र दाखल केले होते. जॅकलीनला घोडा आणि मांजर गिफ्ट करणारा सुकेश चंद्रशेखर कोण ?हा प्रश्न नक्कीच पडला असेल आपल्या सगळयांना. तर हा सुकेश चंद्रशेखर बंगळुरुतला एक उद्योगपती आहे. सुरुवातीला नोकरी देण्याच्या आमिषाने त्याने अनेकांची फसवणूक केली. ७५ जणांचे १०० कोटी रुपये घेऊन त्याने पोबारा केला. निवडणूक आयोगात ओळख असल्याचं सांगून हवं ते चिन्ह मिळवून देण्याचं आमिष त्यानं दाखवलं. याच प्रकरणात दिल्ली पोलिसांनी त्याला २०१७ मध्ये अटक केली होती.