प्रसिद्ध पंजाबी गायक दिलजानचा रस्ते अपघातात मृत्यू झाल्याची धक्कादायक बातमी समोर येत आहे. मंगळवारी पहाटे ३.४५ वाजता ही दुर्घटना घडली असून दिलजानचा जागीच मृत्यू झाल्याचं कळतंय. या वृत्ताने मनोरंजन विश्वावर दु:खाचा डोंगर कोसळला आहे. अमृतसरहून करतापूरला जाताना जंडियाला गुरूजवळ हा अपघात झाला आणि अपघातात दिलजानने जागीच प्राण सोडले. दिलजान हा करतापूरचा राहणारा होता. त्याची गाडी रस्त्याच्या दुभाजकाला धडकल्याने हा भीषण अपघात असल्याचं समजतंय.  

दिलजानची कार अमृतसर-जालंधर जीटी रोडवर जंडियाला गुरू पूलजवळ रस्त्याच्या दुभाजकाला धडकली. घटनास्थळी पोलीस पोहोचल्यानंतर दिलजानचा मृतदेह ताब्यात घेऊन शवविच्छेदनासाठी पाठवण्यात आला आहे. दिलजानची कार दुभाजकाला धडकली कशी आणि यात नेमकी चूक कोणाची याचा तपास पोलीस करत आहेत. मंगळवारी पहाटे दिलजान अमृतसरहून करतापूरला जात होता. यावेळी त्याच्या गाडीचा वेग जास्त असून ती नियंत्रणाबाहेर गेली आणि दुभाजकाला धडकली, अशी प्राथमिक माहिती समोर येत आहे. 

हेही वाचा : 'सर्वतोपरी काळजी घेऊनही टेस्ट पॉझिटिव्ह'; सलील कुलकर्णींना कोरोना

२ एप्रिल रोजी नवीन गाणं होणार होतं प्रदर्शित
येत्या २ एप्रिल रोजी दिलजानचं नवीन गाणं चाहत्यांच्या भेटीला येणार होतं. याच कामानिमित्त तो सोमवारी आपल्या कारने अमृतसरला गेला होता. तिथूनच परत येताना ही दुर्घटना घडली. अपघातावेळी कारमध्ये दिलजान एकटाच होता. दिलजानच्या अकस्मात मृत्यूमुळे त्याच्या चाहत्यांवर शोककळा पसरली आहे. सोशल मीडियाद्वारे अनेकांनी दु:ख व्यक्त केलं आहे. दिलजानने त्याच्या करिअरमध्ये अनेक सुपरहिट पंजाबी गाणी गायली आहेत.