बॉलीवूडमध्ये(Bollywood) असे कितीतरी कपल्स आहेत ज्यांचे लग्नसोहळे(Marraige Ceremony) गाजले. एकमेकांच्या प्रेमात आकंठ बुडालेले फरहान-शिबानी हे देखील त्यापैकी एक कपल आहे. फरहान अख्तर(Farhan Akhtar)आणि शिबानी दांडेकर(Shibani Danekar) गेल्या तीन वर्षांपासून एकमेकांना डेट करीत आहेत. तब्बल तीन वर्षांनंतर त्या दोघांनी लग्नबंधनात अडकण्याचा निर्णय घेतला आहे. त्यांच्या लग्नाआधीच्या सोहळ्यांना सुरुवात झाली आहे. नुकतेच त्यांचा हळदी समारंभ पार पडला. सुरुवातीला सूत्रांनी दिलेल्या माहितीवरुन समजलं होतं की हे दोघे महाराष्ट्रीयन पद्धतीनं लग्न करणार आहेत. पण आता त्यांच्या लग्नाला घेऊन एक नवीनच बातमी समोर येत आहे. या दोघांनी एका वेगळ्याच अंदाजात लग्न करण्याचा घाट घातला आहे. चला जाणून घेऊया हे लव्हबर्ड्स कसं करणार आहेत लग्न.

फरहान-शिबानी खंडाळा येथील अभिनेत्याच्या आलिशान फार्महाऊसवर लग्नगाठ बांधणार आहेत. दोघांचं लग्न अगदी साध्या पद्धतीत होणार असल्याचं बोललं जात आहे. पण तरीही ते थोडं वेगळ्या अंदाजात असेल जेणेकरुन ते लक्षात राहिल असं बोललं जात आहे. मीडियाला मिळालेल्या माहितीनुसार एवढं तर नक्की की हे दोघे ना सप्तपदी चालणार आहेत, ना तीन वेळा कबूल म्हणत लग्न करणार आहेत. एका खास पद्धतीत ते लग्नबंधनात बांधले जाणार आहेत अशी माहिती मिळाली आहे.

माहिती समोर येतेय की,दोघे आपल्या लग्नात एकमेकांना काही वचनं देणार आहेत. जी वचनं त्या दोघांनी लिहिली आहेत. आणि हे दोघे सर्व लोकांसमोर ती वचनं वाचून दाखवणार आहे. दोघांना ओळखणाऱ्या मित्रपरिवारातील काहींनी त्यांच्या या अनोख्या लग्नाविषयी म्हटलं आहे की,''या दोघांचं प्रेम कोणत्याही धार्मिक परंपरेच्या पलिकडचं आहे,त्या दोघांनी एकमेकांवर कोणतीही बंधनं न लादता प्रेम केलं आहे''. १९ फेब्रुवारीला खंडाळा येथील फरहानच्या फार्महाऊसवर हे लग्न होणार असल्यानं तिथला सजावटीचा थाट काही औरच आहे. फुलांनी संपूर्ण फार्महाऊस सजवण्यात आलं आहे,तर रोषणाईचा थाट काही औरच आहे. या लग्नाला फक्त ५० जणांचीच उपस्थिती असणार असल्याचं बोललं जात आहे. १९ तारखेला हे अनोख्या पद्धतीतलं लग्न पार पडल्यानंतर २१ फेब्रुवारीला फरहान-शिबानी कोर्ट मॅरेज करणार आहेत. जावेद अख्तर यांनी यासंदर्भातील माहिती दिली होती.