नागपूर : भारतीयांसाठी चित्रपट, बॉलिवूड हे जिव्हाळ्याचे विषय आहेत. ग्लॅमरच्या दुनियेच्या या आकर्षणातून अनेकांनी आपले नशिब अभिनयामध्ये अजमावतात. काही त्यात यशस्वी झाले, काही प्रयत्न करीत आहेत, तर काहींनी ‘हे आपल्याला जमायचे नाही’ असे म्हणत माघार घेतली. मात्र, उपराजधानीतील स्वप्नील राऊतचे (actor swapnil raut) स्वप्न जरा मोठे होते. त्याने चक्क हॉलिवुडपर्यंत मजल मारीत शहराची पताका साता समुद्रापार रोवली आहे.

लिनो यांची निर्मिती असलेला आणि एम. सुधाकर यांनी दिग्दर्शित केलेला ‘आय वॉज लॉस्ट’ या म्युझिक अल्बममध्ये स्वप्नील मॉडेल म्हणून झळकला आहे. वेवो चॅनलवर हे गाणे प्रसिद्ध झाले आहे. नंदनवन भागातील स्वप्नील हा सर्वसामान्य घरातील मुलगा. त्याचे वडील शेतकरी असून आई गृहिणी आहे. शहरातील व्हीएमव्ही महाविद्यालयामध्ये पदवीचे शिक्षण सुरु असताना त्याला मॉडेलिंगची आवड निर्माण झाली. भाऊजी लोकेश गायकवाड यांनी त्याच्या या गुणांना ओळखत त्याला प्रोत्साहन दिले. सुरुवातीला मॉडेल म्हणून अनेक स्पर्धांमध्ये त्याने भाग घेत ‘वाह वाह’ मिळविली.

पुढे वीरेंद्र गणवीर यांच्या बहुजन रंगभूमीद्वारे त्याने अभिनयाचे धडे घेतले. त्यानंतर तो अभिनयाकडे वळला. मुरुगाडोस दिग्दर्शित आणि प्रसिद्ध अभिनेत्री सोनाक्षी सिन्हा लिडमध्ये असलेल्या ‘अकिरा’ चित्रपटामध्ये काम केले आहे. सोनाक्षीचा मित्र म्हणून स्वप्नील चित्रपट रसिकांना पाहायला मिळाला. तर, वी चॅनेलवरील ‘ग्लॅडरग्स २०१६’ आणि ‘फिटनेस लीग ऑफ इंडिया’ हे रिॲलिटी शो, लाइफ ओके वरील ‘राजा रंजीत सिंग’ मालिका, वेबसीरीज ‘लव स्टोरी’, ‘खुजाते रहो’ आणि काही जाहिरातीमध्येसुद्धा स्वप्नील झळकला आहे. विशेष म्हणजे, ‘खादी, ‘किग्स ॲंड बेरी’, ‘कुलर्स एथनीक’ अशा जगप्रसिद्ध ब्रँडचा तो ब्रँड एम्बिझिडर आहे. तसेच, नागपूर पोलिसांचा ब्रँड एम्बेसिडर म्हणून नागपूर पोलिसांच्या खांद्याला खांदा लाऊन जनजागृती करतो आहे.