गानसम्राज्ञी लता मंगेशकर यांचे काही महिन्यांपूर्वीच निधन होऊन दोन महिने उलटून गेले असतानाच मंगेशकर कुटुंब पुन्हा चिंतेत आहेत. गेले काही दिवस पंडित हृदयनाथ मंगेशकर यांची प्रकृती बरी नसल्याची बाब समोर आली आहे. सध्या त्यांना रुग्णालयात दाखल करण्यात आले आहे. (Hridaynath Mangeshkar hospitalized News Updates)

रुग्णालयात दाखल करण्यामागचे खरे कारण समोर आले नसले तरी गेली काही दिवस त्यांची प्रकृती अस्वस्थ असल्याचे सांगितले जात आहे. हृदयनाथ मंगेशकर हे भारताच्या गानकोकीळा लता मंगेशकर यांचे धाकटे भाऊ आहेत. भारतरत्न लता मंगेशकर यांच्या स्मृतीप्रीत्यर्थ पहिला ‘लता दीनानाथ मंगेशकर’ पुरस्कार सोहळा नुकताच पार पडला. माटुंग्यातील षण्मुखानंद सभागृहामध्ये आयोजित केलेल्या या पुरस्कार सोहळ्यात आदिनाथ मंगेशकर यांनी उपस्थित मान्यवरांना संबोधित केले. यावेळी आदिनाथ मंगेशकर यांनी वडिल पं. हृदयनाथ मंगेशकर यांना रुग्णालयात दाखल करण्यात आल्याची माहिती दिली.

षण्मुखानंद सभागृहातील सत्कार समारंभात भाषण करताना हृदयनाथ मंगेशकर यांचा मुलगा आदिनाथ म्हणाला, 'गेल्या कित्येक वर्षांपासून माझे वडील पंडित हृदयनाथ मंगेशकर हे या कार्यक्रमाचे बीजभाषण सादर करतात. त्यासोबत ते संस्थेचा लेखाजोखा मांडतात. पण यावर्षी ते इथे उपस्थित राहू शकले नाही. कारण त्यांना रुग्णालयात दाखल करण्यात आले आहे. देवाच्या कृपेने ते येत्या १० ते १२ दिवसात घरी परततील.' सध्या त्यांची प्रकृती स्थिर असून त्यात सुधारणाही होत आहे. अशी माहिती समोर आली आहे. पंडित हृदयनाथ मंगेशकर हे ८४ वर्षांचे आहेत.