मराठी चित्रपट, मालिका आणि नाटकांमधून घराघरात पोहोचलेली अभिनेत्री वर्षा दांदळे Varsha Dandale यांचा काही दिवसांपूर्वीच अपघात झाला. भंडारदराहून एका पुरस्कार सोहळ्यातून मुंबईला परतत असताना त्यांचा हा अपघात झाला होता. या अपघातात त्यांना दुखापत झाली असून तेव्हापासून त्या अंथरुणालाच खिळून आहेत. नुकत्याच दिलेल्या एका मुलाखतीत त्यांनी त्यांची व्यथा मांडली. अपघातानंतर अनेक प्रोजेक्ट गमावल्याचं दु:ख त्यांनी व्यक्त केलं. Varsha Dandale accident

ई टाइम्सला दिलेल्या मुलाखतीत त्या अपघाताविषयी म्हणाल्या, "मी एका पुरस्कार सोहळ्यातून परत येत होते. माझ्या कारमध्ये इतरही काही कलाकार होते. मुंबईला कोणत्या मार्गाने जायचं याची माहिती वाटेकरूंना विचारता यावं, म्हणून आमची कार रस्त्याच्या कडेने कार चालवली जात होती. अचानक आमची कार खड्ड्यात पडली आणि आमचा भीषण अपघात झाला. त्यानंतर पुढे काय झालं, ते मला आठवत नाही. मला कोणाचाच आवाज ऐकू येत नव्हता. माझ्यासोबत असलेले इतरही कलाकार जखमी झाले."

अपघातानंतरच्या परिस्थितीविषयी त्या पुढे म्हणाल्या, "सध्या मी अंथरुणालाच खिळून आहे. पायांवर ताण न देण्याचा सल्ला डॉक्टरांनी दिला आहे. अपघातानंतर माझ्यावर शस्त्रक्रिया पार पडली. माझ्या डाव्या पायालाही दुखापत झाली आहे. माझ्यासारख्या कलाकाराला अशा पद्धतीने अंथरुळाला खिळून राहावं लागणं, हे अत्यंत निराशाजनक आहे. मला काम करायला आवडतं. कामाशिवाय असं राहणं मला आवडत नाही. अपघातानंतर मी काही वेब सीरिज आणि प्रोजेक्ट्स गमावले. मला बरं व्हायला अजून तीन ते चार महिने लागतील. निर्माते इतका काळ थांबू शकत नाहीत."

"मी अजूनही सकारात्मक आहे. कारण माझे कुटुंबीय माझ्यासोबत खंबीरपणे उभे आहेत आणि या परिस्थितीतून जाण्यासाठी ते माझी मदत करत आहेत, माझी काळजी घेत आहेत. त्यामुळे मी लवकरात लवकर बरी होऊन पुन्हा कामाला सुरुवात करेन अशी मला आशा आहे", असं त्या म्हणाल्या.

वर्षा दांदळे यांची नांदा सौख्य भरे मालिकेतील 'वच्छी आत्या' ही भूमिका खूपच गाजली. त्यांनी पाहिले न मी तुला, नकटीच्या लग्नाला यायचं हं, घाडगे अँड सून, कृपा सिंधू यांसारख्या मालिकांमध्ये काम केलं आहे.