प्रियंका चोप्रा(Priyanka Chopra) आणि दिया मिर्झा(Dia Mirza) या दोघीही बॉलीवूडच्या प्रसिद्ध अभिनेत्री. त्यात प्रियंकानं थेट हॉलीवूडपर्यंत मजल मारली आहे आणि दिया मिर्झा आता आपलं मातृत्व एन्जॉय करीत आहे. पण या दोघींचं कनेक्शन हे बॉलीवूडच्या आधीपासनं एकमेकींशी आहे बरं का. या दोघीही पहायला गेलं तर सौंदर्य स्पर्धांमधून पुढे आलेल्या. २००० साली दोघींनीही अनुक्रमे 'मिस वर्ल्ड' आणि 'मिस एशिया पॅसिफीक' हे किताब जिंकले होते. त्याचवेळी लारा दत्तानंही 'मिस.युनिव्हर्स' हा किताब पटकावला होता. तर असं एकंदरीत यांच्यातलं कनेक्शन. पण असं काय झालं की आज अनेक वर्षांनी प्रियंकानं दिया मिर्झासंदर्भात काहीतरी पोस्ट केलं आणि त्याची चर्चा झाली.

प्रियंकानं दिया मिर्झाचा जवळ-जवळ २२ वर्षांपूर्वीचा एक फोटो सोशल मीडियावर शेअर केलाय. हा फोटो शेअर करण्याचं निमित्त होतं दियाचा नुकताच पार पडलेला चाळीसावा वाढदिवस. बरं,प्रियंकानं जो फोटो शेअर केलाय तो फोटो आहे दियाच्या अठराव्या वाढदिवसाच्या सेलिब्रेशनचा. ज्यात दियाच्या चेह-याला केक फासलेला दिसत आहे. प्रियंकानं हा फोटो शेअर करीत दिया मिर्झाला वाढदिवसाच्या शुभेच्छा देत म्हटलंय,''मिस.इंडिया स्पर्धेच्या आधी तुझ्या अठराव्या वाढदिवसाच्या निमित्तानं काढलेला फोटो. हॅपी बर्थ डे दी!'' तर दियानंही प्रियंकाच्या पोस्टवर कमेंट करीत म्हटलंय की,''माझा विश्वास बसत नाहीय हा फोटो तुझ्याकडे अजूनही होता''. आणि दियानं तोंड लपवणारा इमोजी त्या कमेंटबॉक्समध्ये पोस्ट केलेला आहे.

प्रियंका आणि दिया नेहमीच सोशल मीडियाच्या माध्यमातून किंवा मुलाखतींमधनं एकमेकींविषयी चांगलं बोलताना दिसतात. मागे एका मुलाखतीत प्रियंकाच्या हॉलीवूड जर्नी विषयीही दिया भरभरून बोलली होती. दियानं नुकताच आपला ४० वा वाढदिवस आपल्या कुंटुंबासोबत सेलिब्रेट केला. तिला नुकताच एक मुलगा झाला आहे. सध्या ती बॉलीवूडपासनं लांब राहून आपल्या मुलासोबत आणि कुटुंबासोबत वेळ घालवताना दिसत आहे. ती नेहमीच आपल्या कुटुंबियांसोबतचे फोटो सोशल मीडियावर शेअर करताना दिसते.