मराठी मालिका 'काहे दिया परदेस'मधून अभिनेता ऋषी सक्सेनाने प्रेक्षकांच्या मनात विशेष स्थान मिळवले आहे. ऋषीची 'गुडबॉय' ही मराठी वेब सीरीज नुकतीच ओटीटी प्लॅटफोर्मवर प्रदर्शित झाली. ही वेब सीरीज हंगामा प्ले या ओटीटी प्लॅटफॉर्मवर प्रेक्षकांना पाहायला मिळणार आहे. 'गुडबॉय' या वेब सीरिजची निर्मिती कॅफे मराठीच्या निखिल रायबोले आणि भुपेंद्रकुमार नंदन यांनी केली आहे. या वेब सीरिजमध्ये ऋषी सक्सेना, खुशबू तावडे, विनय येडेकर, दुष्यंत वाघ, योगेश सोहोनी, अभ्यंग कुवळेकर, रीना अगरवाल हे कलाकार प्रमुख भूमिकेत दिसणार आहेत. बद्रिश पाटील यांनी या सीरिजचं दिग्दर्शन केलं आहे. सौरभ मास्तोळी यांनी संगीत दिग्दर्शन केले आहे. अक्षय राणे यांनी छायांकन केले आहे.

हेही वाचा : 'कल हो ना हो'मधील जिया आठवतेय? इंडस्ट्रीपासून दूर आता करतेय हे काम

कॉलेजमध्ये असल्यापासून खऱ्या प्रेमाच्या शोधात असलेल्या तरूणाचा अनुभव या वेब सीरिजमध्ये दाखवला आहे. वेब सीरिजमध्ये दाखवले आहे की, या तरूणाबद्दल मुलींमध्ये वेगळाच समज निर्माण होतो. यामुळे त्या तरूणाच्या अडचणी वाढतात. त्या अडचणींमधून तो कसा बाहेर पडतो हे या वेब सीरिजमध्ये प्रेक्षकांना पहायला मिळणार आहे. या वेब सीरिजमध्ये ऋषीचा रोमँटिक अंदाज पहायला मिळणार आहे. हंगामा प्ले सोबतच 'मी टीव्ही’वरही ही वेब सीरीज प्रेक्षक पाहू शकतात. या वेब सीरीजचा ट्रेलर १ मार्चला प्रदर्शित झाला. मराठी सोबतच हिंदी ट्रेलर देखील प्रदर्शित झाला आहे.