बॉलिवूड अभिनेत्री कंगना रणावत गेल्या काही दिवसांपासून सातत्याने चर्चेत येत आहे. समाजात घडणाऱ्या प्रत्येक घटनेवर उघडपणे भाष्य करणारी कंगना लवकरच 'थलायवी' आणि 'तेजस' या चित्रपटांमध्ये झळकणार आहे. त्यामुळे सध्या ती या दोन्ही चित्रपटांच्या चित्रीकरणामध्ये व्यस्त आहे. यामध्येच 'तेजस'मधील तिचा फर्स्ट लूक प्रेक्षकांच्या भेटीला आला आहे. विशेष म्हणजे कंगनाचा वाढदिवस असल्यामुळे या दिवसाचं निमित्त साधून या चित्रपटाचं पोस्टर प्रदर्शित करण्यात आलं आहे. तसंच या चित्रपटात कंगना नव्या रुपात प्रेक्षकांना पाहायला मिळणार आहे. 

प्रदर्शित झालेल्या पोस्टरमध्ये कंगना एअरफोर्स ऑफिसरच्या रुपात दिसून येत आहे.  या चित्रपटामध्ये ती एका धाडसी व साहसी अशा महिला फायटर पायलची भूमिका साकारणार आहे. या चित्रपटाचं दिग्दर्शन आणि लेखन सर्वेश मेवाड यांनी केलं आहे. 

काही दिवसांपूर्वीच कंगना या चित्रपटाच्या चित्रीकरणासाठी राजस्थानला रवाना झाली होती. त्यामुळे सध्या येथेच या चित्रपटाचं चित्रीकरण सुरु आहे. 'तेजस' हा चित्रपट २३ एप्रिल रोजी प्रेक्षकांच्या भेटीला येणार असल्याचं म्हटलं जात आहे.

दरम्यान, 'तेजस'पूर्वी कंगनाने तिच्या 'धाकड' या चित्रपटाचं चित्रीकरण पूर्ण केलं आहे. या चित्रपटात कंगना साहसदृश्य करताना दिसून येणार आहे. नुकताच कंगनाला सर्वोत्तम अभिनेत्रीचा राष्ट्रीय पुरस्कार घोषित झाला आहे. ‘मणिकर्णिका द क्वीन ऑफ झांसी’ आणि ‘पंगा’ या चित्रपटांसाठी कंगनाला हा पुरस्कार जाहीर झाला आहे.