अभिनेता व पती सैफ अली खानच्या Saif Ali Khan वाढदिवसानिमित्त अभिनेत्री करीना कपूर Kareena Kapoor खानने सोशल मीडियावर एक खास पोस्ट लिहिली आहे. वाढदिवस साजरा करण्यासाठी तैमुर Taimur आणि जहांगीर Jahangir या दोन मुलांसह सैफ-करीना मालदीवला फिरायला गेले आहेत. मालदीव व्हेकेशनचे फोटो पोस्ट करत करीनाने सैफला शुभेच्छा दिल्या आहेत. 'माझ्या आयुष्यातील प्रेमाला वाढदिवसाच्या शुभेच्छा. अनंतकाळासाठी मला तुझी साथ लाभावी हीच माझी इच्छा आहे', असं करीनाने कॅप्शनमध्ये लिहित दोन फोटो पोस्ट केले आहेत.

सोशल मीडियावर पोस्ट केलेल्या पहिल्या फोटोमध्ये समुद्रकिनारी सैफ-करीना, तैमुर आणि जहांगीर हे निवांत बसलेले पहायला मिळत आहेत. तर दुसऱ्या फोटोमध्ये मालदीवच्या प्रसिद्ध 'इटर्निटी पूल'मध्ये सैफ आणि करीना पोहण्याचा आनंद लुटताना दिसत आहेत. करीनाच्या या पोस्टवर नेटकऱ्यांसोबत अनेक सेलिब्रिटींनी कमेंट करत सैफला शुभेच्छा दिल्या आहेत. 'हॅपी बर्थडे टू हमारे विभूती भैय्या', असं अभिनेता अर्जुन कपूरने लिहिलं आहे. जॅकलिन फर्नांडिस, अमृता अरोरा, मलायका अरोरा, सबा पतौडी यांनीसुद्धा सैफवर शुभेच्छांचा वर्षाव केला आहे.

सैफ आणि करीना ही बॉलिवूडमधील सर्वांत चर्चेत असणारी जोडी आहे. या दोघांच्या वयात दहा वर्षांचं अंतर आहे. २००८ साली 'टशन' चित्रपटाच्या शूटिंगदरम्यान हे दोघं एकमेकांच्या प्रेमात पडले. १६ ऑक्टोबर २०१२ साली मोजक्या पाहुण्यांच्या उपस्थितीत या दोघांनी लग्न केलं. २० डिसेंबर २०१६ रोजी करीनाने तैमुरला जन्म दिला. तैमुर हा सर्वाधिक चर्चेत असलेला स्टारकिड आहे. त्यानंतर या वर्षी २१ फेब्रुवारी रोजी करीनाने दुसऱ्या मुलाला जन्म दिला. सैफ-करीनाने त्यांच्या दुसऱ्या मुलाचं नाव जहांगीर असं ठेवलं आहे.