काश्मीर फाईल्स हा चित्रपट नुकताच रिलीझ झाला असून, चित्रपटाच्या विषयामुळे तो चर्चेचा विषय ठरला आहे. काश्मिरी पंडीतांवर झालेल्या अत्याचार आणि त्यासंबंधित घटनांवर आधारीत हा चित्रपट आहे. दिग्दर्शक विवेक अग्निहोत्री यांच्या या चित्रपटावरून एका ठराविक धर्माच्या लोकांवर लक्ष्य करण्यात आल्याची देखील टीका होतेय. तसंच कपिल शर्माच्या शोसाठी चित्रपट दिग्दर्शकांना पैसे मागितल्याची देखील चर्चा सुरु होती. त्यानंतर आता गुजरात सरकारने या चित्रपटासाठी एक महत्वाचा निर्णय घेतला आहे.

काश्मिरी पंडीतांवर झालेल्या अत्याचार आणि त्यानंतर त्यांना करावं लागलेलं पलायन हा विषय घेऊन, त्यांची व्यथा समजून सांगण्यासाठी हा चित्रपट निर्माण करत असल्याचं दिग्दर्शकांचं म्हणणं आहे. त्यातच आता गुजरात सरकारने महत्वाचा निर्णय घेतला असून, त्यानुसार काश्मीर फाइल्स हा चित्रपट आता राज्यात करमुक्त झाल्याची माहिती मुख्यमंत्री कार्यालयाने दिली आहे.

दरम्यान, पंतप्रधान नरेंद्र मोदी यांनी देखील द काश्मीर फाईल्स या चित्रपटावर आपली प्रतिक्रिया दिली आहे. मोदींनी चित्रपटाची स्तुती करताना चित्रपटाचे निर्माते आणि दिग्दर्शक यांनाही धन्यवाद दिले आहे. अभिनेत्री पल्लवी जोशी यांनी सोशल मीडियावर मोदींच्या भेटीचे फोटो शेयर केले आहेत. यावेळी निर्माता अभिषेक अग्रवाल देखील उपस्थित होते. त्यांनी लिहिलं आहे की, मोदींनी आमच्या चित्रपटाचे कौतूक केले याबद्दल त्यांचे धन्यवाद. आम्ही जे काही तयार केले त्याची त्यांनी दखल घेतली यासाठी त्यांचे विशेष आभार.