प्रसिद्ध टेलिव्हिजन अभिनेत्री आणि खतरों के खिलाडी ११ Khatron Ke Khiladi 11 ची स्पर्धक श्वेता तिवारीला Shweta Tiwari रुग्णालयात दाखल करण्यात आलं आहे. 'इंडियन एक्स्प्रेस'ने दिलेल्या वृत्तानुसार, रक्तदाब कमी झाल्याने तिला रुग्णालयात दाखल करण्यात आलं. श्वेताने तिच्या इन्स्टाग्राम स्टोरीमध्ये हातातील एका पुस्तकाचा फोटो पोस्ट केला आहे. या फोटोमध्ये तिच्या हातावर सलाइन पहायला मिळतेय. यावरून श्वेताच्या चाहत्यांनी तिच्या आरोग्याविषयी काळजी व्यक्त केली आहे. "गेल्या काही दिवसांपासून कामाचं व्यग्र वेळापत्रक असल्याने श्वेताना पुरेसा आराम करता आला नाही. सतत प्रवास, शूटिंग आणि बदलत्या हवामानाचा तिच्या आरोग्यावर परिणाम झाला आहे", अशी माहिती श्वेताच्या टीमने 'इंडियन एक्स्प्रेस'शी बोलताना दिली.

श्वेताला रुग्णालयात दाखल केल्याचं कळताच तिचा पूर्वाश्रमीचा पती अभिनव कोहली याने सोशल मीडियावर एक पोस्ट लिहिली आहे. 'मला माझ्या मुलाच्या भेटण्याची परवानगी देण्याचा वाद एकीकडे आहे, पण मी देवाकडे प्रार्थना करेन की श्वेता लवकरात लवकर बरी व्हावी. बिचारे कलाकार, सर्वांसमोर सुंदर दिसण्यासाठी, प्रेक्षकांचं प्रेम मिळवण्यासाठी, गरजेपेक्षा जास्त बारीक होण्याचा प्रयत्न करतात, कमीत कमी जेवण जेवतात आणि अशा गोष्टींमुळे एके दिवशी त्यांचं शरीर दमून जातं', अशी पोस्ट लिहित अभिनवने श्वेताला टोला लगावला आहे.

खतरों के खिलाडी ११ या रिअॅलिटी शोच्या शूटिंगनिमित्त श्वेता दक्षिण आफ्रिकेतील केपटाऊनला गेली होती. श्वेता आणि अभिवन कोहलीचा वाद सर्वश्रुत आहे. श्वेता मुलाला भेटू देत नसल्याची तक्रार अभिनवने केली आहे. गेल्या दोन दशकांपासून श्वेता मनोरंजनविश्वात काम करतेय. 'कसौटी जिंदगी की' या मालिकेत प्रेरणाची भूमिका साकारत ती घराघरात पोहोचली. ती बिग बॉसच्या चौथ्या सिझनची विजेती ठरली होती.