किम कार्दशियान Kim Kardashian ही जगभरातील सर्वांत प्रसिद्ध मॉडेल असून तिचा प्रत्येक फॅशन चर्चेचा विषय ठरतो. सोशल मीडियावर सक्रिय असलेल्या किमच्या फोटोंवर लाखो लाइक्स आणि कमेंट्स येत असतात. ती पुन्हा एकदा चर्चेत येण्यामागचं कारण म्हणजे किमच्या नव्या फोटोशूटमध्ये तिने वापरलेले कानातले. 'ओम'चं चिन्ह असलेले कानातले किमने घातले असून त्यावरून तिच्यावर टीका होत आहे. किमने भारतीय संस्कृतीचा अपमान केल्याचा आरोप तिच्यावर होत आहे. (kim kardashian trolled after she wears om earings)

ओम हे भारतीयांसाठी अत्यंत पवित्र आणि धार्मिक प्रतिक असून, ते अशा पद्धतीने कानात वापरणं चुकीचं असल्याचं काही नेटकऱ्यांनी म्हटलंय. 'हे सेलिब्रिटी धर्माचा वापर फॅशनमध्ये करणं कधी बंद करतील', असं एकाने म्हटलंय. तर 'तुझ्यासाठी ते फक्त फॅशनचं साधन असलं तरी हिंदूंसाठी ओम हे खूप पवित्र आहे', असं दुसऱ्याने म्हटलं.

किम याआधीही अनेकदा तिच्या फॅशनमुळे ट्रोल झाली आहे. 'ड्रामा क्वीन' म्हणूनच तिची हॉलिवूडमध्ये ओळख आहे. मॉडेलिंगसोबत किम तिच्या चित्रविचित्र पेहराव, मादक फोटोशूट, वादग्रस्त वक्तव्य यांमुळेच जास्त चर्चेत असते. असं असलं तरी इन्स्टाग्राम या फोटो शेअरिंग अॅपवर तिचे सर्वाधिक फॉलोअर्स आहेत. सोशल मीडियावर ब्रँडिंग अथवा जाहिरातीच्या एका पोस्टसाठी ती कोट्यवधी रुपये घेते.