kon honar crorepati : सोनी मराठी (sony marathi) वाहिनीवर 'कोण होणार करोडपती' या कार्यक्रमाचे नवे पर्व सुरू झाले असून या पर्वाची चांगलीच हवा झाली आहे. वेगवेगळ्या परिस्थितीतून आलेले स्पर्धक आणि सेलेब्रिटी स्पर्धक यामुळे कार्यक्रम पाहताना प्रेक्षकांचे पुरेपूर मनोरंजन होत आहे. ज्ञान आणि मनोरंजनाच्या या खेळत येत्या आठवड्यात मात्र आपले डोळे पाणावणार आहेत. कारण जळगावच्या शेतकरी कुटुंबातील ललिता जाधव आपला खडतर आणि तितकाच प्रेरणादायी प्रवास या मंचावर उलगडणार आहेत. (lalita jadhav talks about farmer suicide in kon honar crorepati )

जळगावच्या ललिता जाधव 'कोण होणार करोडपती' या कार्यक्रमात सहभागी होणार आहेत कारण त्यांना मुलांच्या शिक्षणासाठी पैसे साठवायचे आहेत. ललिता या अंगणवाडी शिक्षिका आहेत. या आधी त्या सेविका म्हणून काम करत. पण त्यांना स्वतःची प्रगती करायची होती. म्हणून त्यांनी लग्नानंतर अजून शिक्षण घ्यायचे ठरवले. परंतु घरची परिस्थिती बेताची असल्याने कधी ओवाळणीतून किंवा अजून कुठून जर पैसे भेट म्हणून मिळाले तर ते पैसे त्या जपून ठेवत आणि लागतील तसे ते पैसे शिक्षणासाठी वापरत. असे करून त्यांनी एम.ए. केले आणि त्या शिक्षिका झाल्या.

ललिता यांचे लग्न एका सर्वसाधारण शेतकरी कुटुंबात झाले. त्यामुळे सासरी देखील पैशाची अडचण कायम असायची. कधी हवामान साथ देत नाही तर कधी पिकाला हवा तो भाव मिळत नाही. म्हणून कायम हातात जेमतेम पैसा असे. या सगळ्या मुळे कर्ज घेण्याची वेळ आली पण आता ते कर्ज फेडणार कसे. फेडण्याचा काही मार्ग दिसला नाही म्हणून ललिता यांच्या पतीने कीटकनाशक पिऊन आत्महत्या केली आणि ललिता आणि मुलांना सोडून निघून गेले. त्यानंतरचा खडतर प्रवास ललिता यांनी एकटीने केला. हाच त्यांचा प्रेरणादायी प्रवास 'कोण होणार करोडपती' या कार्यक्रमात त्या मांडणार आहेत. आपल्या मुलांच्या भविष्यासाठी त्या किती रक्कम जिंकतात हेही पाहण्यासारखे आहे. येत्या बुधवारी हा भाग प्रदर्शित होणार आहे.