मुंबई : भारतरत्न लता मंगेशकर यांचं वयाच्या ९२ व्या वर्षी निधन (Lata Mangeshkar Passes Away) झालं. त्यांच्या पार्थिवावर शिवाजी पार्क येथे अंत्यसंस्कार (Lata Mangeshkar Funeral) करण्यात आले. यावेळी राजकीय क्षेत्रातील दिग्गजांपासून तर शाहरुख खान, श्रद्धा कपूर, रणबीर कपूर, जावेद अख्तर या बॉलिवूडमधील अनेक दिग्गजांनी हजेरी लावली होती. पण, प्रसिद्ध आणि ज्येष्ठ कलाकार अमिताभ बच्चन (Amitabh Bachchan) यावेळी दिसले नाही. त्याचं कारण आता समोर आलं आहे.

लता मंगेशकर यांच्या निधनाचे वृत्त समजताच अमिताभ बच्चन यांनी पेडर रोडवरील लता दीदींच्या घरी धाव घेतली. यावेळी त्यांची मुलगी श्वेता देखील सोबत होती. लता दीदींच्या कुटुंबीयांची भेट घेतली. त्यांचे सांत्वन केले. त्यानंतर बीग बी निघून गेले. पण, रविवारी सायंकाळी दादर येथील शिवाजी पार्कवर झालेल्या अंत्यसंस्कारावेळी अमिताभ बच्चन दिसले नाही. यावेळी पंतप्रधान नरेंद्र मोदींपासून (PM Modi) ते महाराष्ट्राचे मुख्यमंत्री उद्धव ठाकरेंपर्यंत (Maharashtra CM Uddhav Thackeray) सर्वजण लतादीदींना अखेरचा निरोप देण्यासाठी हजर होते. पण, बिग बी आले का नाही? असा प्रश्न अनेकांना पडला होता. त्याबाबतच सूत्रांनी माहिती दिली आहे. कोरोना प्रोटोकॉल आणि स्वतःच्या आरोग्याची काळजी घेत त्यांनी शिवाजी पार्कवरील अंत्यसंस्काराला उपस्थित राहणं टाळलं. अंत्यसंस्कारामध्ये मोठ्या प्रमाणात गर्दी होती. त्यामुळे बिग बी यांनी निवासस्थानी जाऊन लता दीदींच्या कुटुंबीयांची भेट घेतली, असं सूत्रांनी सांगितलं.

दरम्यान, अमिताभ बच्चन यांनी लता मंगेशकरांच्या निधनाबद्दल शोक व्यक्त केला. लता दीदी आम्हाला सोडून गेल्या. अनेक शतकांपासून घुमत असलेला आवाज आम्हाला सोडून गेला. आता त्यांचा आवाज स्वर्गात घुमतोय, अशा शब्दात दुःख व्यक्त करत बिग बी यांनी लता दीदींना श्रद्धांजली वाहिली.