ओंकार भोजने सध्या सर्वाधिक चर्चेत असणारा अभिनेता आहे. ओंकारची हास्यजत्रामधील यशस्वी वाटचाल, त्यानंतर तिथून बाहेर पडत त्याने निवडलेली नवी वाट. यामुळे त्याचे कौतुकही झाले आणि टीकाही. पण ओंकार काही मागे हटला नाही. ओंकारने 'हौस आकाशी उंच उडायची' म्हणत झेप घेतली आणि 'सरला एक कोटी'सारखा दमदार चित्रपट केला.

एवढेच नाही तर आता ओंकार 'करून गेलो गाव' या धुमशान घालणाऱ्या मालवणी व्यावसायिक नाटकातून प्रेक्षकांच्या भेटीला देखील आला आहे. 'करून गेलो गाव' या नाटकाची सध्या जोरदार चर्चा असून ते 'हाऊसफुल्ल' झाले आहे. याच निमित्ताने ओंकारशी सकाळ unplugged मध्ये दिलखुलास संवाद साधला आहे. यावेळी ओंकारणे स्वतःबद्दल अनेक गोष्टी सांगितल्या आहेत.

ओंकारला प्रेमाबद्दल जेव्हा विचारण्यात आले तेव्हा तो म्हणाला, "प्रेम हे ठरवून होत नाही, मला ते कधी झालं नाही. मी पहिल्यापासूनच या सगळ्या भानगडीत पडत नाही. लग्नाची सगळी जबाबदारी घरच्यांनी आणि मित्र परिवारांनी घेतली असल्यामुळे त्याचा विचार करण्याची आता काही गरज नाही".