टेलिव्हिजन अभिनेत्री माही विजच्या Mahhi Vij भावाचं कोरोनाने निधन झालं. माहीने सोशल मीडियावर तिच्या भावाचा फोटो पोस्ट करत दु:ख व्यक्त केलं. अभिनेता सोनू सूदने Sonu Sood माहीच्या भावाला रुग्णालयात बेड मिळवण्यासाठी मदत केली होती. तिने सोनूचेही आभार मानले. 'परिस्थितीला सामोरं जायचं धैर्य जेव्हा माझ्यात नव्हतं, तेव्हा तू मला आशेचा किरण दाखवलास. सत्याशी कुठेतरी झगडत असताना माझा भाऊ घरी परतेल असं मला वाटत होतं. पण तू केलेल्या मदतीसाठी मी तुझे आभार मानते. हजारो, लाखो गरजू लोकांची मदत तू करतोयस, तुझ्या धैर्याला सलाम', अशा शब्दांत माहीने कृतज्ञतेची भावना व्यक्त केली. (Mahhi Vij loses her brother to Covid 19 says thanks to Sonu Sood for finding a hospital bed)

माहीच्या भावासाठी सोनू सूदनेही ट्विट केलं होतं. 'ज्या २५ वर्षीय तरुणाचा जीव वाचवण्यासाठी आम्ही प्रयत्न करत होतो, त्याचा कोरोना विरोधातील लढा अयशस्वी ठरला. त्याची जगण्याची शक्यता फार कमी होती हे माहित असतानाही मी रोज आशेने डॉक्टरांशी बोलत होतो. त्याच्या पालकांना सत्य सांगण्याचं धाडस माझ्यात नव्हतं', असं सोनू सूदने ट्विट करत लिहिलं होतं.

किश्वर मर्चंट, सुयश राय, रिधी डोग्रा, युविका चौधरी, कांची कौल यांसारख्या इतर सेलिब्रिटींनी माहीला धीर देण्याचा प्रयत्न केला. माहीने 'कैसी लागी लगन', 'लागी तुझसे लगन', 'लाल इश्क' यांसारख्या मालिकांमध्ये भूमिका साकारल्या आहेत. अनेक म्युझिक व्हिडीओंमध्येही ती झळकली आहे.