'मन उडु उडु झालं' man udu udu jhala या मालिकेतील अभिनेता अजिंक्य राऊत Ajinkya Raut अपघातातून थोडक्यात बचावला. अपघातानंतर अजिंक्यने सोशल मीडियावर त्याच्या गाडीचा व्हिडीओ पोस्ट केला. 'देवाच्या कृपेने मी ठीक आहे', असंही त्याने त्या व्हिडीओमध्ये म्हटलंय. दिवाळीनिमित्त अजिंक्य त्याच्या गावी परभणीला जात होता. याच प्रवासादरम्यान त्याचा हा अपघात झाला.

'कृतज्ञतेच्या भावनेने प्रत्येक क्षण जगा. कारण क्षणात सर्वकाही नष्ट होऊ शकतं. देवाच्या कृपेने माझे प्राण वाचले. मी ठाण्याहून परभणीला जाताना हा अपघात झाला. तुम्हीसुद्धा काळजी घ्या आणि सुरक्षित रहा. ता.क.- मी गाडी चालवत नव्हतो', असं त्याने या व्हिडीओच्या कॅप्शनमध्ये लिहिलं आहे. सोशल मीडियावर पोस्ट केलेल्या व्हिडीओमध्ये अजिंक्यची गाडी शेतात पडल्याचं पहायला मिळत आहे. "आमच्या गाडीचा वेग सर्वसाधारणच होता, त्यामुळे मोठी दुर्घटना टळली. नशिबाने रस्त्याच्या बाजूला दरी नव्हती. ११०० व्होल्टच्या खांबाला आमची गाडी धडकणार होती. माझ्या मित्राने खांबाचा धक्का चुकवण्यासाठी गाडी फिरवली आणि ती रस्त्याच्या बाजूला असलेल्या शेतात घसरली. सुदैवाने आम्हाला गंभीर दुखापत झाली नाही", असं त्याने म्हटलं.

"कुठलाच पुरस्कार, कुठलीच प्रसिद्धी कामी येत नाही, जेव्हा एखादा जीवघेणा प्रसंग समोर येतो. या प्रसंगातून देवाने मला वाचवलं. सगळं क्षणार्धात नष्ट होण्यासारखं आहे, त्यामुळे तुम्हीसुद्धा स्वत:ची काळजी घ्या," असं तो पुढे म्हणाला. अजिंक्यच्या या व्हिडीओवर चाहते आणि इंडस्ट्रीतील मित्रांनी कमेंट करत त्याला काळजी घेण्याचं आवाहन केलं. 'मन उडु उडु झालं' या मालिकेत अजिंक्य राऊत हा इंद्राची भूमिका साकारतोय.