अभिनेत्री मंदिरा बेदीचा Mandira Bedi पती आणि दिग्दर्शक राज कौशल Raj Kaushal यांचे निधन झाले. कार्डिअॅक अरेस्टने त्यांचे निधन झाल्याची माहिती समोर येत आहे. ते ४९ वर्षांचे होते. बुधवारी पहाटे ४.३० वाजताच्या सुमारास राज यांचे कार्डिअॅक अरेस्टने निधन झाले. राज यांनी अभिनेता म्हणून करिअरची सुरूवात केली होती. मात्र नंतर ते दिग्दर्शनाकडे वळले. रविवारी मंदिरा आणि राज यांनी एका गेट-टुगेदरचं आयोजन केलं होतं. या पार्टीला नेहा धुपिया, अंगद बेदी, सागरिका घाटगे, झहीर खान, आशिष चौधरी आणि त्यांची पत्नी यांनी हजेरी लावली होती. मंदिरा आणि राज यांनी गेल्या वर्षी जुलै महिन्यात चार वर्षीय ताराला दत्तक घेतलं. या दोघांना वीर हा मुलगासुद्धा आहे. (mandira bedi husband raj kaushal passes away)

राज यांच्यासोबत काम केलेले दिग्दर्शक ओनिर यांनी ट्विट करत शोक व्यक्त केला. 'खूप लवकर आम्हाला सोडून गेलास. दिग्दर्शक, निर्माता राज कौशलला आपण गमावलं. अत्यंत दु:खद बातमी आहे. 'माय ब्रदर निखिल' या माझ्या पहिल्या चित्रपटाच्या निर्मात्यांपैकी तो एक होता. आमच्या दृष्टीकोनावर त्याने विश्वास ठेवला होता आणि आमची साथ दिली होती. तुझ्या आत्म्याला शांती लाभो', अशा शब्दांत ओनिरने दु:ख व्यक्त केलं.

मंदिरा बेदी आणि राज कौशलने १९९९ मध्ये लग्नगाठ बांधली. या दोघांना तारा ही मुलगी आणि वीर हा मुलगा आहे. गेल्या वर्षी जुलै महिन्यात मंदिरा आणि राजने चार वर्षीय ताराला दत्तक घेतलं. राजने 'अँथनी कौन है' (२००६), 'शादी का लड्डू' (२००४), 'प्यार मे कभी कभी' (१९९९) या चित्रपटांचं दिग्दर्शन केलं. २०२० मध्ये 'हिंदुस्तान टाइम्स'ला दिलेल्या मुलाखतीत मंदिराने पतीविषयी म्हटलं होतं, 'राजने मला नेहमीच प्रोत्साहित केले आहे. तो माझी ताकद आहे.'