अभिनेता ऋषी कपूर आणि परेश रावल बऱ्याच मोठ्या कालावधीनंतर एकत्र आलेत. १९९९ मध्ये प्रदर्शित झालेला ‘आ अब लौट चले’ या चित्रपटात या दोघांनी एकत्र काम केलं होतं. आता हे दोघे इतक्‍या वर्षांनंतर पहिल्यांदा ‘पटेल की पंजाबी शादी’ या सिनेमात झळकणार आहेत. या चित्रपटात परेश रावलने गुजराती आणि ऋषी कपूरने पंजाबी व्यक्तीची भूमिका साकारलीय. याबाबत ऋषी कपूर म्हणाले की, हा चित्रपट स्वीकारण्यामागे दोन कारणं आहेत. एक म्हणजे यातील माझा रोल आणि दुसरं म्हणजे परेश रावलसोबत काम करण्याची संधी. यापूर्वी आम्ही दोघांनी काम केलेलं आहे. ‘आ अब लौट चले’ या चित्रपटाचं दिग्दर्शन मी केलं होतं. त्यामुळे त्या वेळी मला परेश रावलला दिग्दर्शित करायला मिळालं होतं. ‘पटेल की पंजाबी शादी’ या चित्रपटाची कथा पंजाबी मुलगा व गुजराती मुलीच्या प्रेमकथेवर आधारित आहे. त्यामुळे या सिनेमात चटपटीत लव्हस्टोरी पाहायला मिळणार आहे. या सिनेमाचा ट्रेलर नुकताच प्रदर्शित झालाय. या ट्रेलरला खूप चांगली पसंती मिळाली असून यात जबरदस्त विनोदाची मेजवानी मिळणार आहे. हा सिनेमा १५ सप्टेंबरला प्रदर्शित होणार आहे.