Kiran Mane on Maratha Reservation News: किरण माने हे मराठी मनोरंजन विश्वातील लोकप्रिय अभिनेते. किरण माने विविध सामाजिक, राजकीय विषयांवर पोस्ट करत असतात.

गेल्या अनेक दिवसांपासून सुरु असलेल्या मराठा आरक्षणाच्या आंदोलनाला माने पाठिंबा देत आहेत. ते सोशल मीडियावर याविषयी विविध पोस्ट करत आहेत. अशातच त्यांनी आज मराठ्यांना सावध केलं आहे.

किरण मानेंनी सोशल मीडियावर पोस्ट करुन लिहीलंय की, "मराठा बांधवांनो, तहात हारू नका.
"...सदर अध्यादेश १६ फेब्रूवारी २०२४ पासून किंवा त्यानंतर लागू होईल." आणि "...यामुळे बाधित व्यक्ती दरम्यानच्या काळात आपल्या हरकती, सूचना संबंधितांकडे नोंदवू शकतील, ज्या विचारत घेण्यात येतील." हा तिढा लै लै लै महत्त्वाचा आहे.
निव्वळ निवडणुकांसाठीचे हे गाजर आहे. जागे रहा.
एक मराठा लाख मराठा"

आरक्षणाविषयी भुजबळ काय म्हणाले?

मराठा समाजाच्या आरक्षविषयी भुजबळ म्हणाले, "मराठा समाजाचा विजय झाला असं वाटतंय पण मला तसं काही पूर्ण पणे वाटत नाही. अशा प्रकारे झुंडशाहीने नियम, कायदे बदलता येत नाहीत. आम्ही शपथ घेताना कोणालाही न घाबरता काम करु अशी शपथ घेतो. पण, आता जे झालं आहे ती एक सूचना आहे. याचे रुपांतर नंतर होईल"

भुजबळ पुढे म्हणाले, "सगेसोयऱ्यांच्या अध्यादेशावर १६ फेब्रुवारीपर्यंत हरकती मागवण्यात आल्या आहेत. महाराष्ट्रातील ओबीसी समाजाचे आणि इतर समाजातील वकील असतील त्यांनी याचा अभ्यास करुन यावर हरकती लाखोंच्या संख्येने पाठवाव्यात. जेणेकरुन सरकारला लक्षात येईल ही याबाबत दुसरीही बाजू आहे."