मुंबईः व्हॅलेंटाईन डेचा मुहूर्त साधत अभिनेता प्रथमेश परबने साखरपुडा केला आहे. त्याने त्याच्या आयुष्याची जोडीदार निवडली असून क्षितिजा घोसाळकरसोबत त्याचा साखरपुडा झाला आहे.

व्हॅलेंटाईन डेच्या शुभमुहूर्तावर प्रथमेशने सोशल मीडियावर पोस्ट शेअर करत याबद्दल माहिती दिली. 'आमचा व्हॅलेंटाईन डे' असं म्हणत प्रथमेशने साखरपुड्याचे फोटो शेअर केले आहेत. चाहत्यांनी या जोडीला भरभरुन शुभेच्छा दिल्या.

दरम्यान, प्रथमेशचा नवीन चित्रपट प्रेक्षकांच्या भेटीला आला आहे. 'ढिशक्यांव' चित्रपटाचे पोस्टर प्रेक्षकांच्या भेटीस आले आणि तेव्हापासून या पोस्टरने प्रेक्षकांची उत्सुकता अधिकच ताणली गेली आहे. विनोद आणि प्रेम याचे उत्तम समीकरण साधत प्रथमेश परब अभिनित 'ढिशक्यांव' हा चित्रपट सिनेरसिकांच्या भेटीस आला आहे.

प्रथमेश परब याच्यासोबत या चित्रपटात संदीप पाठक, अहेमद देशमुख, सुरेश विश्वकर्मा, मेघा शिंदे या कलाकारांनी भूमिका निभावल्या आहेत.

त्यातच आता प्रथमेशने क्षितिजासोबत साखरपुडा केला आहे. परबांच्या घरी आता लग्नाची धूम सुरु झाली आहे. ऐन व्हॅलेंटाईन डेच्या दिवशी हा चाहत्यांसाठी सुखद धक्का आहे.

प्रथमेश आणि क्षितिजाच्या लग्नाची तारीखदेखील जाहीर झाली आहे. पुढच्या दहा दिवसांनी म्हणजे 24 फेब्रुवारीला ते लग्नबंधनात अडकणार आहेत.