अभिनय क्षेत्रात कलाकार आपलं काम चोख करण्याचा प्रयत्न करतात आणि त्यासाठी ते अधिक कष्टदेखील घेतात. काम करताना बऱ्याचवेळा त्यांना अनेक भयानक घटनांना सामोरं जावं लागतं. मराठमोळी अभिनेत्री मयुरी देशमुखसोबत (Mayuri Deshamukh) असंच काहीसं घडलं आहे. सध्या मयुरी इमली या हिंदी मालिकेत काम करत आहे. 'इमली'च्या सेटवर तिच्यासोबत नुकतीच एक भयानक घटना घडली आहे.

स्टार प्लसवर येणाऱ्या 'इमली' या मालिकेत मयुरी देशमुख महत्त्वपूर्ण भूमिकेत आहे. अगदी कमी कालावधीतच या मालिकेला प्रचंड लोकप्रियता मिळाली. नुकताच मालिकेत एक महत्त्वाचा सीन शूट केलं जातं होता. या सीनमध्ये मयुरी एक फोटो घेऊन बसलेली असते आणि या फोटोला आग लावण्याचा सीन होता. सीन शूट करायला सुरुवात झाली आणि अचानक मयुरीच्या लक्षात आलं की आगीची एक ठिणगी तिच्या साडीवर येत आहे. तेव्हा तिने प्रसंगावधान दाखवत लगेचच मागे सरकली. त्यामुळे सुदैवाने तिला कोणतीही इजा झाली नाही. हा व्हिडीओ मयुरीने स्वतः तिच्या इंस्टाग्राम अकांऊटवरून पोस्ट केला आहे. 'प्यार से डर नही लगता साहब, आग से लगता है', असं कॅप्शन तिने या व्हिडीओला दिलं आहे.

या मालिकेत मयुरी ही मालिनीची भूमिका साकारत आहे. या मालिकेत मयुरीसह मराठी अभिनेता गश्मीर महाजनी देखील आहे. मयुरीचं काम मराठीप्रमाणेच हिंदी प्रेक्षकांनाही आवडत आहे. अनेक मालिकांमध्ये मयुरीने सोज्वळ आणि समजूतदार अशा भूमिका साकारल्या आहेत. पण या मालिकेत मयुरी खलनायिकाची भूमिका साकारताना दिसत आहे. याआधी मयुरी 'खुलता कळी खुलेना' या मराठी मालिकेतून घराघरात पोहोचली. यात तिने डॉक्टरची भूमिका साकारली होती.