मला कोणताही फॅड फॉलो करायला आवडत नाही. कम्फर्टेबल असण्यासोबतच स्टायलिश कपडे घालण्याला प्राधान्य देते. आपण जी स्टाईल करतो, त्या कपड्यांमध्ये जर कम्फर्टेबल असू तरच ते कपडे उत्तम प्रेझेन्ट करू शकतो. कम्फर्टेबल नसू तर ते अवघड होतं, तेच आपल्या चेहऱ्यावरही झळकत असतं.

मी नेहमीच काहीतरी वेगळं करण्याच्या प्रयत्नात असते. माझ्या लग्नात मला नऊवारी साडी नेसायची आहे, हे माहिती होतं, पण टिपीकल नऊवारी किंवा नऊवारीमध्ये असलेले कॉमन रंग नको होते.

नऊवारीला एक वेगळा लूक द्यायचा होता. त्यासाठी मी पेस्टल पिंक रंगाची निवड केली. माझ्या लग्नातल्या रिसेप्शनचा अजून एक ड्रेस म्हणजे निळ्या रंगाचा. तो स्वप्नील शिंदे याने डिझाईन केला होता. त्या ड्रेसला प्रिंटेड बनारसी लाँग फ्रिल ट्रेल आहे. ती ट्रेल काढली तर त्या ड्रेसचा वनपीसही होऊ शकतो. मला असे वेगवेगळे आणि युनिक कपडे घालायला जास्त आवडतात.

मला असं वाटतं आपल्याकडेच असलेल्या कपड्यांमध्ये आपण काहीतरी नवीन शोधण्याचा प्रयत्न केला तर आपण नक्कीच काहीतरी नवीन स्टाईल निर्माण करू शकतो. मी तरुणांना आवर्जून सांगू इच्छिते की, एखादा ट्रेंड सुरू आहे म्हणून त्याला फक्त फॉलो करू नका, आपल्यावर काय उठून दिसते आहे याकडे लक्ष द्या. ट्रेंडमध्ये असलेले कपडे आपल्या उंचीला, आपल्या शरीरयष्टीला सूट होत आहेत की नाही, याचं भान ठेवणं जास्त गरजेचं आहे. 

शब्दांकन - स्नेहल सांबरे