आज (११ मार्च) देशभरात महाशिवरात्री साजरी केली जात आहे. माघ कृष्ण चतुर्दशी या तिथीला 'महाशिवरात्री' साजरी केली जाते. यादिवशी देवांचे देव आणि तिन्ही लोकांचे स्वामी भगवान शंकराची आराध्या केली जाते. अनेकजण या दिवशी उपवास करतात. १६ सोमवारांच्या व्रताचं फळ केवळ एका महाशिवरात्रीच्या उपवासाने मिळतं, अशी आख्यायिका आहे. महाशिवरात्रीच्या दिवशी शंकराची पूजा केल्यास सर्व अडी-अडचणी दूर होतात असं म्हटलं जातं. महाशिवरात्रीनिमित्त सोशल मीडियावरही अनेक शिवभक्त शंकराचे फोटो आणि व्हिडीओ पोस्ट करत एकमेकांना शुभेच्छा देत आहेत. अशातच काही मराठी अभिनेत्रींनीदेखील महादेवाच्या रुपात फोटोशूट करत काही फोटो आणि व्हिडीओ पोस्ट केले आहेत. 

'वैजू नंबर १' या मालिकेती अभिनेत्री सोनाली पाटीलने शंकराच्या अवतारात फोटोशूट केला आहे. कॅप्शनमध्ये महामृत्यूंजय मंत्र लिहित तिने हा फोटो पोस्ट केला आहे. एका हातात त्रिशूळ आणि दुसऱ्या हातात शंख असं हे शंकराचं रुप आहे. अभिनेत्री दिपाली सय्यदनेही फोटोशूट केला असून त्याचा व्हिडीओ तिने पोस्ट केला आहे. 'बिग बॉस मराठी' फेम अभिनेत्री रुपाली भोसलेनंही खास फोटोशूट केलं आहे. 

हेही वाचा : 'सासरे फक्त म्हणायला, तो मला बाबापेक्षाही जवळचा'; श्रीकांत मोघेंसाठी प्रिया मराठेची भावूक पोस्ट

समुद्र मंथनातून निघालेलं हलाहल विष याच दिवशी शंकराने प्राशन केलं होतं आणि जगाचा विनाश होण्यापासून वाचवलं होतं. हेच ऋण फेडण्याचा दिवस म्हणजे महाशिवरात्री अशी दंतकथा आहे. तर काही कथांनुसार, या दिवशी देवी पार्वती आणि शंकराचा विवाहसोहळा या दिवशी पार पडला होता. या दिवसाच्या अनेक दंतकथा असल्या तरी शिवभक्तांसाठी आजचा दिवस फार महत्त्वाचा असतो. मध्यरात्रीपर्यंत आज महादेवाचा जागर केला जातो.