'मराठी बिग बॉस सिझन 3' चा विनर विशाल निकम(Vishal Nikam) सध्या चर्चेत आहे. बिग बॉसच्या घरात खरा माणूस बनून खेळलो म्हणूनच आपण जिंकलो अन् संबंध महाराष्ट्राला आवडू लागलो असं विशालनं विजेतेपद पटकावल्यानंतर आपल्या प्रत्येक मुलाखतीतून सांगितलं आहे. सोशल मीडियावर सध्या विशाल अधिक सक्रिय आहे. त्याने बिग बॉसचं विजेतेपद पटकावल्यानंतर तडक त्याचं गाव गाठलं होतं. गावातल्या काही आवडत्या जागांची भेट त्यानं त्याच्या चाहत्यांना व्हिडीओ पोस्टच्या माध्यमातून करून दिली होती. आता पुन्हा त्यानं आपल्या आईच्या आठवणीत एक व्हिडीओ पोस्ट केलाय ज्यामुळे त्याच्यासोबत त्याचे चाहतेही भावूक झालेले दिसत आहेत.

शूटिंग निमित्तानं विशाल हा आपल्या कुटुंबापासून लांब राहतो. अर्थात अनेक कलाकारांना आपल्या कामाच्या निमित्तानं घरापासून वेगळं राहावं लागतच. विशालही त्याला अपवाद नाही. विशालनं आईसोबतच्या व्हिडीओ कॉलला रेकॉर्ड करून तो पोस्ट केलेला आहे. त्या व्हिडीओच्या बॅकग्राऊंडला 'मेरे मॉं के बराबर कोई नही' हे गाणं ऐकू येत आहे. त्या पोस्टला कॅप्शन देताना त्यानं लिहिलं आहे,''मिस यू मॉं''.आणि सोबत हार्ट इमोजीही पोस्ट केले आहेत. त्याच्या या पोस्टवर त्याच्या चाहत्यांनीही प्रतिक्रिया देत आईच्या प्रेमाविषयी आपल्या भावनाही कमेंट बॉक्समध्ये लिहिल्या आहेत. विशाल लवकरच एका मराठी सिनेमातून आपल्याला मोठ्या पडद्यावर दिसणार आहे.