आज सकाळी मनोरंजन विश्वातून एक दुख:द बातमी समोर आली. फ्रेंड्स या आयकॉनिक शोमध्ये चँडलर बिंगची भूमिका साकारणारा प्रसिद्ध अभिनेता मॅथ्यू पेरी याचे वयाच्या ५४ व्या वर्षी निधन झाले. त्याच्या निधनाने त्याच्या चाहत्यांना धक्का बसला आहे. पोलिस अधिकार्‍यांनी दिलेल्या माहीतीनुसार, शनिवारी मॅथ्यू त्याच्या लॉस एंजेलिस येथील घरी हॉट टबमध्ये मृतावस्थेत आढळला.

अमेरिकन कॅनेडियन विनोदी अभिनेता आणि निर्माता मॅथ्यू पेरी हा लोकप्रिय सिटकॉम शो फ्रेंड्सच्या सहा मुख्य लीड्सपैकी एक होता. यात मॅथ्यूने चँडलर बिंगच्या भूमिकेनंतर प्रसिद्धीस आला.

पेरीच्या मृत्यूने चाहत्यांना धक्का बसला आहे. त्याच्यासाठी नेटकरी सोशल मीडियावर पोस्ट शेयर करत श्रद्धांजली वाहत आहे. त्याच दरम्यान मॅथ्यूने त्याच्या सोशल मिडियावर केलेली शेवटची पोस्ट आता चर्चेत आली आहे.

मॅथ्यूच्या मृत्यूनंतर त्याची इंस्टाग्राम पोस्ट व्हायरल झाली आहे. त्याच्या मृत्यूचा आणि त्या पोस्टचा संबध असल्याचे चाहते बोलत आहेत.

पाच दिवसांपूर्वी त्याच्या इंस्टाग्रामवर मॅथ्यूने इन्फिनिटी पूलमध्ये गरम पाण्यात आराम करतानाचा फोटो शेअर केला होता. या पोस्टच्या कॅप्शनमध्ये त्याने लिहिले होते की, "अरे, इतकं गरम पाणी आजूबाजूला फिरत राहिल्याने तुम्हाला बरं वाटतं? मी मॅटमॅन आहे",

त्यानंतर पाच दिवसात मॅथ्यूचा मृतदेह लॉस एंजेलिसच्या घरी हॉट टबमध्ये आढळला. आता त्याचे चाहते ती पोस्ट शेयर करत असा दावा करत आहे की, पोस्टमध्ये मॅथ्यू त्याच ठिकाणी आहे जिथे तो मृत सापडला आहे, परंतु अद्याप याबाबत माहीती मिळालेली नाही.

ट्विटरवरील नेटिझन्सने पोस्ट शेयर करत लिहिले आहे की, "ही त्याची 5 दिवसांपूर्वीची पोस्ट होती आणि तो नेमका इथेच बुडाला आहे. त्याचा हॉट टब. !!!",

तर दुसऱ्याने लिहिले, "मॅथ्यू पेरीची शेवटची इंस्टाग्राम पोस्ट ही आहे. त्याच्या हॉट टबमधला फोटो. किती वाईट आहे." मॅथ्यू पेरी यांच्या निधनावर नेटिझन्सने सोशल मिडियावर पोस्ट शेयर केल्या आहेत.