कोरोना महामारी आणि लॉकडाउन यांमुळे शूटिंग बंद झालं. काम बंद झाल्याने आणि काही प्रोजेक्ट्स रखडल्याने अनेक कलाकारांना नैराश्याला सामोरं जावं लागलं. 'बिग बॉस मराठी'चं Bigg Boss Marathi पहिलं सिझन जिंकणारी अभिनेत्री मेघा धाडेनंसुद्धा Megha Dhade नैराश्याचा सामना केला. नुकत्याच दिलेल्या एका मुलाखतीत मेघा याविषयी मोकळेपणाने व्यक्त झाली. (Megha Dhadhe opens up about getting panic attacks and depression during pandemic)

'ई टाइम्स'ला दिलेल्या मुलाखतीत मेघा म्हणाली, "मागचा महिना माझ्यासाठी खूप कठीण होता, कारण मला सारखे पॅनिक अटॅक्स येत होते. आजूबाजूच्या परिस्थितीला पाहून मला सतत चिंता सतावत होती. काही गोष्टींचा माझ्यावर भावनिकदृष्ट्या फार लवकर परिणाम होतो. एखाद्याने जवळची व्यक्ती गमावली असेल तर त्यांना पाहून मीसुद्धा खचून जायचे. कोरोना महामारीचा सामना करताना ज्यांनी आपल्या जवळच्या व्यक्तींना गमावलं, त्यांच्या दु:खाविषयी तर मी विचारसुद्धा करू शकत नाही."

नैराश्याचा सामना करण्यासाठी मेघाने तिच्या परीने काही उपाययोजना केल्याचं सांगितलं. "मी जवळच्या मित्रमैत्रिणींना फोन करून त्यांच्याशी बोलू लागले. एखाद्याशी बोलून मन मोकळं होतं. मला लोकांशी बोलायची सवय असल्याने नैराश्याचा सामना करताना ही गोष्ट फार उपयोगी पडली. मी खूप साहसी, धाडसी आहे असं मला वाटायचं. मी लवकर खचून जाणार नाही, असा माझा समज होता. पण या काळाने मला खूप काही शिकवलं. कठीण परिस्थितीत आपल्याला एकमेकांची काळजी घ्यायला हवी", असं ती पुढे म्हणाली.

मेघा धाडेनं 'बिग बॉस मराठी'चं पहिलं पर्व गाजवलं होतं. बिग बॉसच्या घरातून बाहेर पडल्यानंतरही मेघा सोशल मीडियावरील तिच्या फोटो आणि व्हिडीओंमुळे सतत चर्चेत असायची. मेघा लग्नाआधी प्रेग्नंट राहिल्याने ती कमी वयात आई झाली. या काळातही तिला अनेक संकटांचा सामना करावा लागला होता. मेघाला एक मुलगी आणि एक मुलगा आहे.