सोशल मीडियावर परखडपणे राजकीय मत व्यक्त केल्याने अभिनेते किरण माने (Kiran Mane) यांना स्टार प्रवाहवरील ‘मुलगी झाली हो’ (Mulgi Zali Ho) या मालिकेतून बाहेर काढल्याचं बोललं जात होतं. मात्र मालिकेचे दिग्दर्शक व कलाकारांनी हा दावा खोडून काढत किरण माने यांना त्यांच्या गैरवर्तणुकीमुळेच मालिकेतून काढल्याचं सांगितलं. याप्रकरणी काही राजकीय नेत्यांनीही उडी घेत प्रतिक्रिया दिल्या. तर दुसरीकडे 'मुलगी झाली हो' या मालिकेतील किरण मानेंच्या सहकलाकारांनीही मत व्यक्त केलं. मालिकेत साजिरीची भूमिका साकारणारी अभिनेत्री दिव्या पुगांवकर (Divya Pugaonkar) हिनेसुद्धा किरण मानेंवर आरोप केले. (Marathi Actress)

एका वृत्तवाहिनीला दिलेल्या मुलाखतीत दिव्या म्हणाली, "मी या मालिकेत मुख्य अभिनेत्री असल्याचं त्यांना सतत खटकायचं. त्यावरून ते मला सतत टोमणे मारायचे. माझ्या वडिलांविरोधात ते बोलले, मला उघडपणे टोमणे मारले. माझ्याविरोधात अपशब्द उच्चारले. कुठला बाप आपल्या मुलीसाठी अपशब्द उच्चारतो", असा सवाल दिव्यानं केला. 'माझ्यावर ते मानसिक दबाव आणत होते. त्यांच्या गैरवर्तणुकीमुळे त्यांना मालिकेतून काढून टाकण्यात आलं आहे. ही घटना अचानक घडलेली नाही. सेटवर इतर कलाकारांसोबत त्यांची जी वागणूक होती, ती चुकीची होती. त्यांना तीन वेळा इशारासुद्धा देण्यात आला होता. वारंवार सांगूनही स्वभावात बदल न झाल्याने त्यांच्यावर कारवाई झाली', असं दिव्याने सांगितलं.

किरण माने यांना मालिकेतून बाहेर काढल्यानंतर राजकीय वातावरण तापलं होतं. नेटकरी तसेच काही राजकीय नेत्यांनी हा सांस्कृतिक दहशतवाद असल्याचं मत व्यक्त केलं होतं; मात्र त्यानंतर किरण माने यांच्याविरोधात ‘मुलगी झाली हो’ मालिकेतील कलाकार एकवटले आहेत. याबाबत दिग्दर्शक सचिन देव म्हणाले, की अभिनेते किरण माने यांची सेटवरील वागणूक बरोबर नव्हती. त्यांना प्रॉडक्शन हाऊसकडून तीन वेळा समज देण्यात आली होती. तरीही त्यांनी आपली वागणूक सुधारली नाही. त्यामुळे त्यांना मालिकेतून काढण्यात आलं. कोणत्याही राजकीय पक्षाच्या दबावाखाली किंवा राजकीय मत सोशल मीडियावर मांडलं म्हणून काढण्यात आलेलं नाही. अभिनेत्री शर्वाणी पिल्ले म्हणाल्या, की किरण माने यांची बोलण्याची आणि वागण्याची पद्धत बरोबर नव्हती. आपल्यामुळेच ही मालिका चालते, असा टेंभा वारंवार ते मिरवत होते. त्यांच्या अशा गैरवर्तणुकीमुळेच त्यांना काढण्यात आलं आहे. परंतु त्यांनी या गोष्टीला राजकीय रंग दिला आहे. ज्येष्ठ अभिनेत्री सविता मालपेकर यांनीही शर्वाणी पिल्ले आणि सचिन देव यांच्या प्रतिक्रियेला दुजोरा दिला आहे.