बॉलिवूड अभिनेत्री सारा अली खान ही तिच्या बिनधास्त अंदाजामुळे नेहमी चर्चेत असते. तिचे आई-वडील म्हणजेच सैफ अली खान आणि अमृता सिंग यांच्या घटस्फोटाविषयी ती मोकळेपणे बोलताना दिसते. लहाणपणीचे काही किस्से ती मुलाखतींमध्ये नेहमी सांगिताना दिसते. नुकतंच एका मुलाखतीत साराने सांगितले की, ओमकारा या चित्रपटातील सैफ आणि कलयुग या चित्रपटातील अम्रिताला पाहिल्यानंतर तिला वाटलं की तिचे वडील शिवीगाळ करतात आणि आई पॉर्न साइट चालवते.

'हार्पर बाजार इंडिया' या मासिकेला दिलेल्या मुलाखतीत साराने तिच्या लहानपणीच्या आठवणी सांगितल्या. "मी जेव्हा ओमकारा आणि कलयुग हे चित्रपट पाहिले, तेव्हा मला माझे आई-वडील वाईट आहेत, असं वाटायचं. तेव्हा मी खूप लहान होते आणि मला वाटायचं, माझे वडील शिवीगाळच करतात आणि माझी आई एक पॉर्न साइट चालवते. त्याच वर्षी त्या दोघांना नकारात्मक भूमिकांसाठी सर्वोत्कृष्ट अभिनेता आणि अभिनेत्रीचे नामांकन मिळालं होतं", असं ती म्हणाली. २००६ मध्ये प्रदर्शित झालेल्या ओमकारा या क्राईम ड्रामामध्ये सैफ अली खानने 'लंगडा' त्यागीची भूमिका साकारली होती. या चित्रपटात अजय देवगण, करीना कपूर, कोंकना सेन शर्मा आणि विवेक ओबेरॉय यांच्याही भूमिका होत्या. तर २००५ मध्ये प्रदर्शित झालेल्या कलयुग चित्रपटात अमृता सिंगसोबत कुणाल खेमू हा मुख्य भूमिकेत होता.

साराने २०१८ मध्ये अभिषेक कपूरच्या केदारनाथ या चित्रपटातून बॉलिवूडमध्ये पदार्पण केलं. त्यानंतर तिने सिम्बा, लव्ह आज कल २, कुली नंबर १ अशा चित्रपटांत काम केलं आहे. ती लवकरच आनंद. एल. रायच्या अतरंगी रे या चित्रपटात अक्षय कुमार आणि धनुषसह मुख्य भुमिकेत दिसणार आहे.